A mund ta ushqeni fëmijën me qumësht gjiri kur jeni shtatzënë

Ndonëse jeni shtatzënë organizmi juaj do të vazhdojë që të prodhojë qumësht dhe ju mund ta vazhdoni gjidhënien

Ass. dr. Memli Morina, mr. sci
gjinekolog – obstetër
tel. 045 725 725

Mos u bëni merak se bebja në barkun tuaj rrezikohet nga gjidhënia ose që qumështi i gjirit ndryshon aq shumë sa që mund ta rrezikojë fëmijën që po e ushqeni me gji, por sido që të jetë duhet të informoheni për disa ndryshime.

Bebja juaj do t’i merr të gjitha materiet e nevojshme ushqyese, vetëm se duhet të kujdeseni që të hani shëndetshëm dhe t’i merrni vitaminat (sidomos acidin folik dhe vitaminën D).

A rrezikohet shtatzënia nëse e vazhdoni gjidhënien?

Gjatë gjidhënies organizmi juaj prodhon hormonin oksitocinë që e mundëson rrjedhjen e qumështit. Oksitocina poashtu lirohet gjatë lindjes. Ajo i rrit tkurrjet e mitrës gjatë lindjes, por nuk ka dëshmi se gjidhënia gjatë shtatzënisë mund t’i stimulojë tkurrjet e mitrës.

Megjithatë, konsultohuni me mjekun tuaj se a mund të vazhdoni me gjidhënien, sidomos nëse keni pasur aborte, lindje të parakohshme ose nëse keni shtatzëninë me binjakë.

Deri kur mund të vazhdoni me gjidhënie?

Normalisht, rreth muajit të pestë të shtatzënisë gjiri juaj fillon të prodhojë kulloshtrën (si përgatitje për lindjen e bebes). Kjo mund ta ndryshojë shijen dhe sasinë e qumështit, prandaj fëmija juaj mund ta lë gjirin vetvetiu.

Nëse fëmija juaj nuk e lë gjirin, nuk ka asnjë problem nëse vazhdojë të ushqehet me qumësht gjiri. Kjo nuk do të thotë se bebja juaj (pas lindjes) do të ketë më pak kulloshtër.

Nëse fëmija juaj është nën 1 vjeç dhe ju e ushqeni me gji, përcillni peshën e tij pas ndryshimit të qumështit për t’u vërtetuar se nuk do të ketë ngecje në zhvillim.

Ju mund të vazhdoni edhe pas lindjes t’i ushqeni me qumësht gjiri edhe beben e posalindur e edhe fëmijën tuaj. Mos u bëni merak se mos ndoshta nuk prodhoni mjaftueshëm qumësht për të dy!

Qumështi i gjirit do të prodhohet bollshëm për të dy fëmijët. Për më tepër gjasat që të zhvillohet mastiti janë më të vogla tek gratë që ushqejnë të dy fëmijët me qumësht gjiri.

Share With:



124 Views