Familja e truprojës së Elvana Gjatës thyen heshtjen, flet psikologia

Emisioni “Fol me psikologen” ka trajtuar ngjarjen e rëndë të ndodhur disa ditë më parë. Vrasja në bllok është parë nga një tjetër këndvështrim nga psikologia Ervisa Lula dhe i ftuari sociologu i njohur Ergys Mërtiri.

Këngëtarja Elvana Gjata u etiketua nga media si “molla e sherrit” duke u vënë në qendër të kësaj historie. Komentues të shumtë kanë fyer rëndë këngëtaren. Disa kanë shkuar deri atje sa e kanë akuzuar se po jep një model të gabuar tek ndjekësit e saj.

2 ekspertët kanë analizuar këtë sjellje agresive të shoqërisë e cila më së shumti i keqtrajton vajzat dhe njerëzit e dobët. Sociologu Mërtiri e ka etiketuar si një sjellje perverse. Gjatë bisedës është sjellë në vëmendje figura e komandos Mevjol Bilo. Babai i 2 fëmijëve ndodhet në arrati. Mediat thonë se ai ka qenë personi i cili ka qëlluar më armë dhe ka vrarë Fabian Gaxhën.

Për herë të parë është sjellë një dëshmi mbi gjendjen e familjarëve të komandos. Psikologia Lula pas bisedave të bëra me familjarë të tij thotë se bashkëshortja dhe dy fëmijët janë në gjendje shoku. Ata nuk arrijnë të besojnë atë që ka ndodhur. Sipas familjes, Bilo ka qenë përherë një baba dhe një njeri i dashur dhe profili i vrasësit i dhënë në media për ta është i pabesueshëm.