Vëllai i shpëtoi jetën motrës me anë të një gudulisjeje

Një 11-vjeçar i shpëtoi jetën motrës pasi dalloi se po zhvillohej një tumor i rrallë në fytin e saj ndërkohë që po e guduliste. Aaron East po luante me motrën e tij 7-vjeçare, Amy, dhe vuri re masën kancerogjene kur Amy po qeshte. Ai i tha nënës Carly, 31 vjeç, e cila u shqetësua aq shumë sa e çoi menjëherë vajzën në spital. Vajza u diagnostifikua me “rhabdomyosarcoma”, një formë e rrallë kanceri.
Amy iu nënshtrua operacionit për heqjen e tumorit, ndërsa tani i duhet të udhëtojë për në Amerikë për një terapi me rreze, që mund të jetë më e saktë dhe të vrasë tumoret. Kjo lloj terapie nuk është akoma e disponueshme në Britani, ku jeton edhe vajza. Nëna e fëmijëve tregon se mendoi menjëherë se Amy mund të kishte tumor, duke qenë se xhaxhai i saj kishte ndërruar jetë së fundmi nga kanceri, ndërsa i ati ishte trajtuar gjithashtu për këtë sëmundje vdekjeprurëse. Ajo thotë se ndihet tepër krenare për të birin, pasi i shpëtoi jetën të motrës. Ndërsa e vogla Amy tashmë e konsideron vëllanë si heroin e saj.

Çfarë është “RHABDOMYOSARCOMA”?
Më pak se 60 fëmijë diagnostifikohen çdo vit me këtë lloj të rrallë kanceri në Angli. Pjesa më e madhe e tyre janë më të vegjël se 10 vjeç,
dhe më e përhapur është tek djemtë sesa tek vajzat. Këto tumore zhvillohen nga indet muskulore ose fijezore, dhe mund të rriten në çdo pjesë të trupit. Pjesët ku zhvillohen më shumë janë: përreth kokës dhe qafës, në fshikëzën e urinës, fyt, stomak ose vaginë. Ndonjëherë tumoret gjenden edhe në muskuj ose gjymtyrë, tek gjoksi ose në muret abdominale.
Nëse tumori shfaqet në kokë pse në pjesën e qafës, mund të përhapet edhe në tru apo përreth shtyllës kurrizore. Nuk dihet akoma se nga çfarë shkaktohet ky lloj kanceri. Fëmijët me çrregullime të rralla gjenetike, si sindroma Li-Fraumeni, kanë rrezik më të lartë për t’u prekur nga ky lloj kanceri. Simptoma më e zakonshme është formimi i një gjëndre ose ënjtje.