1 në 2 vajza adoleshente dhunohet online

Sipas një raporti të fundit nga WeWorld që analizon rreziqet në internet dhe abuzimin e të miturve, 1 në 2 vajza vuan një formë dhune në mediat sociale. Një shifër alarmante.

Raporti (i titulluar Lundrimi pa busull. Njohja dhe parandalimi i rreziqeve në internet për djemtë, vajzat dhe adoleshentët) gjithashtu thekson se një në tre adoleshentë, nga mosha 13 deri në 18 vjeç, pretendon se kontrollon rregullisht celularin e partnerit të tyre.

WeWorld e kishte trajtuar këtë temë të mprehtë vitin e kaluar dhe këtë herë donte ta thellonte temën duke u fokusuar në format më të përhapura dhe më të dëmshme të dhunës në internet ndaj fëmijëve dhe adoleshentëve. Pyetja kryesore është gjithmonë e njëjta, më e vështira: a mundet përdorimi i pavetëdijshëm i internetit të ketë efekte negative në të ardhmen e të rinjve dhe në shëndetin e tyre mendor?

“Rritja e rasteve të abuzimit online ndaj vajzave, djemve dhe adoleshentëve na shqetëson shumë”, tha Martina Albini, pjesë e Qendrës së Avokimit dhe Studimit.

“Kjo është arsyeja pse ne vazhdojmë punën tonë për edukimin e marrëdhënieve, dashurisë dhe barazisë në shkolla dhe në qendrat tona arsimore. Mjetet dixhitale nuk duhet të demonizohen, sepse sjellin me vete shumë mundësi, por duhen njohur dhe përdorur me vetëdije”.

Ndër problemet e ndryshme që kanë të bëjnë me përdorimin e rrjeteve sociale nga të miturit është edhe përpjekja e disa vajzave për të tërhequr miratimin e jashtëm nga komuniteti virtual përmes publikimit të fotove personale.

Siç thuhet në raport, ‘vajzat mund të nxiten të ndajnë përmbajtje që i ekspozon ato ndaj fenomeneve të tilla si ekspozimi trupit, me pasoja të rëndësishme në shëndetin e tyre fizik dhe mendor’. Sipas raportimeve, 58% e vajzave nga mosha 14 deri në 16 vjeç kanë përjetuar dhunë të llojeve të ndryshme në rrjetet sociale. Midis tyre, 39% kanë qenë viktima të ekspozimit dhe më pas turpërimit prej fotove nudo.

Prandaj, duket absolutisht e nevojshme të plotësohen boshllëqet legjislative në lidhje me përdorimin e internetit nga më të rinjtë. Kjo nënkupton rregullim të kujdesshëm që synon mbrojtjen e fëmijëve nga rreziqet në internet. Fëmijët dhe adoleshentët, thotë raporti, duhet të pajisen me mjetet e nevojshme për ‘të marrë pjesë në jetën online në një mënyrë të sigurt, etike dhe të përgjegjshme si pjesë e zhvillimit të tyre’, siç thuhet nga fushata WEB Safe & Wise.