Publikohet video e rrallë e Shkurte Fejzës kur këndonte si 13 vjeçare në fillimet e karrierës së saj

Një thesar arkivor është ndarë me publikun nga Radio Televizioni Publik i Kosovës, që sjell një kujtim të paharruar të këngëtares së madhe shqiptare, Shkurte Fejza.

Videoja e postuar në rrjetet sociale është një dokument i rrallë që na kthen pas në kohë, në vitin 1974, kur Shkurtja ishte vetëm një vajzë e re, 13-vjeçare, që bënte hapat e parë në skenën artistike.

Në këtë video të rrallë, interpretuesja e këngës legjendare “Mora Fjalë” shfaqet në paraqitjen e saj televizive të parë duke kënduar me një pasion dhe natyralitet të jashtëzakonshëm.

Ajo interpreton këngën për Vojo Kushin, performancë e cila u mbajt në fshatin Mushtisht të Suharekës – prej nga edhe artistja ka prejardhjen.

Me një zë të ëmbël dhe të plotë, që edhe në atë moshë të re demonstron potencialin e një ylli në ngritje, Shkurte Fejza tashmë la gjurmë në zemrat e atyre që e dëgjuan.

Fejza ishte pjesë e Shoqërisë Kulturore Artistike “Afërdita”, një platformë që do t’i jepte atij talenti të lindur mundësinë për të shkëlqyer dhe për të marrë vendin që meritonte në muzikën popullore dhe patriotike.

Videoja e botuar nga RTK nuk është thjesht një kujtim i bukur, por edhe një dëshmi e fuqisë së muzikës dhe e përkushtimit të artistëve që e kanë nderuar kulturën shqiptare.