Meghan Trainor rrëfen ndryshimin drastik: Humbja e peshës filloi kur u përballa me diabetin në shtatzëni
Këngëtarja Meghan Trainor ka treguar se diagnoza me diabet gestacional gjatë shtatzënisë së saj të parë ishte pika që i ndryshoi plotësisht qasjen ndaj shëndetit dhe e vuri në rrugën e humbjes së peshës. Gjatë një interviste në KIIS FM më 20 nëntor, Trainor, 31 vjeçe, u shpreh se komentet publike rreth pamjes së saj e kanë shoqëruar gjatë gjithë karrierës. “Njerëzit më thonë: ‘Pse je kaq e dobët tani? Ti ishe vajza e ‘All About That Bass’.’ Po unë isha 19 vjeç kur doli ajo këngë,” tha ajo.
Ajo shtoi se pas diagnozës me diabet gestacional filloi të mësonte mbi ushqyerjen dhe aktivitetin fizik. “Që prej asaj kohe jam në një udhëtim shëndeti. U fiksova pas idesë së të kuptuarit të trupit tim, hormoneve, shëndetit të zorrëve, sepse dua të ndihem mirë dhe kjo punë është e vështirë nëse nuk je mirë fizikisht.”
Trainor tregoi se tani stërvitet me pesha tre herë në javë dhe ka vendosur shëndetin në plan të parë, sidomos për fëmijët e saj dhe dëshirën për të vazhduar turin muzikor gjatë viteve. Megjithatë, ajo pranoi se ka marrë edhe kritika për dobësimin e saj. Në mars, këngëtarja zbuloi se përdorte Mounjaro, një medikament GLP-1, të cilin e mori pas lindjes së fëmijës së dytë, në kombinim me ndihmën e një dietologu, trajnim dhe ndryshime të jetesës.
“Jam në një udhëtim për t’u bërë versioni më i fortë i vetes për fëmijët e mi dhe për mua,” u shpreh ajo.
