“Në luftë” me nusen e madhe, por më të voglat e shoqërojnë vjehrrën Victoria në Paris

Ngjarjet në jetën personale po e trondisin jo pak, por gjërat nuk po shkojnë njësoj për karrierën e Victoria-s. Ndërsa të gjithë ende po komentojnë rrëfimin e Brooklyn-it, ajo ndodhet në Paris duke festuar arritjen e parë të këtij viti.

Victoria Beckham u dekorua në Paris si Kalorëse e Urdhrit të Arteve dhe Letërsisë (Chevalière de l’Ordre des Arts et des Lettres) nga Ministria Franceze e Kulturës, në një ceremoni që vlerëson kontributin e saj në art, modë dhe kulturë, si në Francë ashtu edhe në arenën ndërkombëtare.

Shpjegim: Titulli Kalorës/e i/e Urdhrit të Arteve dhe Letërsisë është një nga nderimet më prestigjioze të Francës dhe u jepet individëve që kanë dhënë kontribute të rëndësishme në art, letërsi dhe kulturë.

Lajmin ashtu si edhe disa fotografi nga momenti i inagurimit ajo i ndau me ndjekësit në Instagram ku shprehej mirënjohëse për vlerësimin duke thënë se kjo arritje ishte pasojë e viteve të tëra përkushtimi.

“Ndihem e nderuar që jam emëruar “Kalorëse e Urdhrit të Arteve dhe Letërsisë” nga Ministria Franceze e Kulturës. Gjithmonë kam admiruar estetikën franceze dhe seriozitetin me të cilin moda trajtohet aty, si të ishte art. Prandaj ky vlerësim është një privilegj i madh, i cili është pasqyrim i disa dekadave përkushtimi,” shkruan ajo në një pjesë të postimit.

Ndër të tjera, gjatë fjalës së saj, falënderoi veçanërisht bashkëshortin, David Beckham, të cilin e quajti investitorin e saj të parë, për besimin që ka treguar ndaj saj, pasionin dhe vendosmërisë për të ndërtuar diçka për të cilën të dy mund të jenë krenarë.

Çdo dalje e postim i familjes Beckham ka qenë në qendër të vëmendjes javët e fundit. Të gjithë presin versionin e saj të historisë ndaj asaj çfarë Brooklyn tregoi, por ndoshta ajo ia ka lënë këtë reagim një momenti të dytë.