Brooklyn Beckham bën dedikim për vjehrrin, ndërsa tensionet me familjen e tij vazhdojnë
Brooklyn Beckham ka festuar publikisht ditëlindjen e vjehrrit të tij, biznesmenit dhe investitorit miliarder Nelson Peltz, duke e cilësuar atë si “vjehrrin më të mirë”.
Për 83-vjetorin e Peltz-it, themeluesi i markës Cloud23 publikoi në Instagram Stories një fotografi ku të dy pozonin të përqafuar.
“Gëzuar ditëlindjen, Nelson. Të dua shumë. Jam shumë i lumtur që munda të festoja me ty sot. Faleminderit që je vjehrri më i mirë”, shkroi 27-vjeçari.
Edhe bashkëshortja e tij, Nicola Peltz, ndau një dedikim emocional për të atin, së bashku me një fotografi ku shfaqeshin të tre.
“Ndihem vërtet me fat që jam rritur duke të parë si një shembull kaq të jashtëzakonshëm në çdo aspekt. Je babai më i mirë që mund të ëndërroja. Na do pa kushte, na mëson se asnjë ëndërr nuk është tepër e madhe dhe se, mbi të gjitha, duhet të jemi njerëz të mirë”, shkroi ajo.
Dedikimi i Brooklyn-it për vjehrrin është vënë në kontrast me marrëdhënien e tij aktuale me prindërit, David dhe Victoria Beckham.
Familja raportohet se ka kaluar një periudhë përplasjesh të forta, të cilat u bënë publike në janar, kur Brooklyn publikoi një mesazh kritik drejtuar prindërve të tij.
Tensionet besohet se përfshijnë edhe vëllezërit Romeo dhe Cruz, si dhe motrën e vogël, Harper.
Gjatë fundjavës së Ditës së Babait, David dhe Victoria u fotografuan në një lokal në perëndim të Londrës me djemtë e tyre më të vegjël, Romeo dhe Cruz, dhe partneret e tyre. Brooklyn nuk ishte i pranishëm në këtë takim.
Megjithatë, të dy prindërit e përfshinë djalin e madh në postimet e tyre në rrjetet sociale. Victoria publikoi një fotografi të vjetër të katër fëmijëve me të atin, ndërsa David ndau kujtime nga fëmijëria dhe portrete individuale me secilin prej tyre.
Sipas një raportimi të “The Sun”, Brooklyn nuk e priti mirë gjestin publik, pasi u kishte kërkuar familjarëve të mos e etiketonin dhe të mos e përfshinin në postimet e tyre.
“Ai është shumë i zemëruar. U ka kërkuar ta lënë të qetë, por ata vazhdojnë të publikojnë për të”, pretendoi një burim.
Sipas të njëjtit person, postime të tilla e rikthejnë vazhdimisht konfliktin në qendër të vëmendjes, ndërsa Brooklyn dëshiron që familja të respektojë distancën e kërkuar prej tij.
As Brooklyn dhe as përfaqësuesit e familjes Beckham nuk kanë komentuar drejtpërdrejt mbi këto raportime.
Reklama që u interpretua si thumbim ndaj familjes
Brooklyn e përmendi së fundmi në mënyrë të tërthortë situatën familjare në një reklamë të DoorDash për Kupën e Botës.
Në spot, ai hedh mbi tavolinë disa bileta për ndeshjet dhe shpjegon se do ta ndjekë Botërorin nga shtëpia, pavarësisht se i ka biletat.
“Nuk është se nuk kam bileta. Arsyeja është… një histori e gjatë”, thotë ai përpara se t’ia dhurojë ato korrierit që mbërrin në derën e tij.
Fraza u interpretua nga shumë ndjekës si një referencë ndaj përçarjes me familjen.
Vëllai i tij, Cruz, reagoi pak më vonë teksa ndiqte me David Beckham ndeshjen mes Anglisë dhe Ganës në Boston.
Ai publikoi një fotografi ku shfaqej duke parë telefonin në vend të fushës dhe shkroi me ironi: “Mos u shqetësoni, ishte gjatë pushimit të reklamave.”
Brooklyn dhe Nicola janë shfaqur gjithnjë e më të afërt me familjen Peltz, ndërsa kontaktet e tyre me familjen Beckham duket se janë reduktuar.
Megjithatë, postimet e David dhe Victoria-s tregojnë se prindërit vazhdojnë ta përfshijnë djalin e tyre të madh në kujtimet dhe dedikimet familjare.
Mbetet e paqartë nëse këto gjeste do të shërbejnë si një përpjekje për pajtim apo do ta thellojnë më tej përplasjen. Për momentin, urimi i ngrohtë i Brooklyn-it për Nelson Peltz vetëm sa ka rikthyer në vëmendje distancën me familjen ku ai u rrit.
