Sofía Vergara dhe i biri reagojnë pas deklaratave befasuese të ish-bashkëshortit të saj
Manolo González Vergara, djali 35-vjeçar i aktores Sofía Vergara, ka publikuar një mesazh në rrjetet sociale që duket se lidhet me pretendimet e ish-bashkëshortit të së ëmës, aktorit Joe Manganiello, në librin e tij të ri me kujtime.
Më 8 tetor, Manolo ndau në story-t e Instagramit një grafik që krahasonte një “burrë të mirë” me një “burrë narcist”. Mes karakteristikave të përmendura, në grafik thuhej se burrat e mirë vendosin kufij, ndërsa burrat narcistë manipulojnë të tjerët duke i bërë të dyshojnë te vetja dhe te perceptimi i tyre për realitetin.
Krahas grafikut, Manolo shkroi:
“Mbani mend, fëmijë: kur keni të bëni me një narcist, nuk ka rëndësi sa shumë bëni për të, sepse ai do t’ju mbajë mëri përgjithmonë. Asgjë nuk do të jetë ndonjëherë e mjaftueshme dhe, në një mënyrë apo në një tjetër, ai gjithmonë do të përpiqet t’ju paraqesë si personin e keq.”
Një ditë më vonë, edhe Sofía Vergara, 54 vjeç, ripublikoi mesazhin e të birit. Ajo ndau gjithashtu një postim të Tom Brady-t, ku thuhej:
“Aftësia për të qeshur me veten është ndoshta forma më e lartë e inteligjencës. Pamundësia për të qeshur me veten është një shenjë e sigurt se ke të bësh me një budalla.” Aktorja e shoqëroi postimin me një emoji duartrokitjesh.
Reagimet e tyre në rrjetet sociale vijnë pasi këtë javë u publikuan fragmente nga libri i ri i Manganiello-s.
Në kujtimet e tij, aktori 49-vjeçar shkruan se sëmundja autoimune nga e cila vuan ndikoi në martesën e tyre. Sipas revistës People, ai pretendon se marrëdhënia kishte humbur çdo lloj afërsie emocionale dhe se Vergara i refuzonte përkëdheljet edhe kur ai ia kërkonte.
Manganiello dhe Vergara u martuan në vitin 2015 dhe u divorcuan në vitin 2024. Në librin e tij, aktori kundërshton gjithashtu versionin e aktores për arsyen e ndarjes.
Më herët, Vergara i ka thënë gazetës spanjolle El País se martesa e tyre mori fund sepse bashkëshorti ishte më i ri dhe dëshironte të bëhej baba, ndërsa ajo nuk donte të kishte fëmijë në një moshë më të madhe. “Nuk mendoj se kjo është e drejtë për fëmijën”, u shpreh ajo asokohe.
Manganiello, nga ana tjetër, pretendon se kishte hequr dorë nga ideja për të pasur fëmijë për shkak të sëmundjes së tij.
