Princi George surprizon me talentin, vizatimi i tij publikohet në revistën prestigjioze “Country Life”

Një vizatim i një peshkatarit mbretëror (kingfisher), i realizuar nga Princi George, është pjesë e një edicioni special të revistës Country Life, të cilin e ka redaktuar si kryeredaktor i ftuar babai i tij, Princi i Uellsit.

13-vjeçari e ka vizatuar zogun, i cili qëndron mbi një degë, gjatë qëndrimit në shtëpi në pranverë.

Vepra artistike është përfshirë në një edicion special prej 300 faqesh të revistës, në të cilin intervistë ka dhënë edhe Princesha e Uellsit.

Përveçse ofron një pasqyrë të jetës familjare, Princi William e shfrytëzon revistën edhe për të ngritur çështjen e kushteve të punës për gratë pjesëtare të forcave të armatosura, si dhe për të treguar përkrahjen e tij të zjarrtë për klubin e futbollit Aston Villa.

Princi George filloi studimet në Eton College në shtator.

George, për të cilin thuhet se e pëlqen vizatimin, duket se po ndjek gjurmët e familjarëve të tij.

Gjyshi i tij, Mbreti Charles, është gjithashtu një adhurues i artit dhe pikturës. Edhe nëna e tij, Catherine, si dhe xhaxhai, Duka i Sussex-it, kanë studiuar art në nivelin A-level. Catherine ka studiuar gjithashtu historinë e artit në universitet.

Vitin e kaluar, Catherine, Princi George dhe motra e vëllai i tij, Princesha Charlotte dhe Princi Louis, vizatuan portretet e njëri-tjetrit. Katër vizatimet u publikuan në rrjetet sociale nga Pallati Kensington.

Pallati bëri të ditur se familjarët mbretërorë i kishin realizuar skicat si një “moment lidhjeje”, për të kaluar kohë së bashku, duke u përqendruar te njëri-tjetri dhe duke shprehur kreativitetin përmes artit.

Katër vizatimet e realizuara nga katër anëtarët e familjes mbretërore u publikuan pa zbuluar se kush kishte vizatuar kë dhe kë paraqiste secili portret.

Në pjesë të tjera të këtij edicioni, Catherine, e cila dy vite më parë bëri të ditur se po merrte trajtim kundër kancerit, thuhet se ka folur për fuqinë shëruese të natyrës.

Princi William ka folur për shëtitjet me qentë e familjes, Orla dhe Otto, si dhe për dashurinë që fëmijët e tij kanë për të dalë jashtë dhe për të eksploruar natyrën.

Ai ka treguar gjithashtu për kënaqësinë që i sjell vizita në një pub dhe pirja e një gote musht molle (cider) me akull.

Në revistë është përfshirë edhe trajneri i Aston Villas, Unai Emery, i cili e ka cilësuar përkrahjen e princit për klubin si “fantastike”, para publikimit të edicionit.

“Nëse mund t’i japim atij lajme të mira, rezultate të mira apo momente të bukura në futboll, ne jemi krenarë për këtë”, është shprehur ai në një video.

Një tjetër temë e rëndësishme e këtij edicioni të revistës Country Life, e publikuar këtë javë, është angazhimi i Princit William për të siguruar që gratë në forcat e armatosura britanike të ndihen të sigurta.

Princi i Uellsit ka bërë thirrje për krijimin e një kulture ushtarake më gjithëpërfshirëse dhe më respektuese ndaj grave. Ai ka theksuar se duhet bërë më shumë për të garantuar që gratë në ushtri të trajtohen me respekt dhe të mbrohen nga ngacmimet seksuale.

Kjo vjen pas vdekjes së 19-vjeçares Jaysley Beck, ushtare e cila humbi jetën në vitin 2021. Një hetim gjyqësor arriti në përfundimin se dështimi i ushtrisë për të ndërmarrë masa, pasi Gunner Beck ishte ngacmuar nga eprori i saj i drejtpërdrejtë dhe ishte sulmuar seksualisht nga një koleg tjetër, kishte kontribuar në vetëvrasjen e saj.

Princi William nuk është anëtari i parë i familjes mbretërore që merr rolin e redaktorit të ftuar të revistës Country Life.

Mbreti Charles e ka redaktuar këtë revistë në disa raste, përfshirë edicionet e veçanta me rastin e 65-vjetorit dhe 70-vjetorit të lindjes së tij. Edicione të mëparshme janë redaktuar gjithashtu nga Mbretëresha Camilla dhe Princesha Anne. /Kids’Time/