Edini 7-vjeçar njeh edhe katragjyshin edhe stërgjyshin… 5 breza bashkë, në një foto
7 vjeçari Edin (Sami) Abdurrahmani nga fshati Bresanë i Opojës duket se është fëmijë me fat të veçantë nga se i takon brezit të pestë që bashkëjeton në një familje të madhe. Ai ka fatin të përkëdhelet nga babai, gjyshi, stërgjyshi dhe katragjyshi! Është ky rast shumë i rrallë jo vetëm në Kosovë, por edhe në botë kur 5 breza jetojnë në të njëjtën kohë!
Katragjyshi i Edinit, haxhi Bajram Abdurramani i lindur më 24.01.1925 në Bresanë, ndonëse ka hyrë në dekadën e dhjetë të jetës, duket ende vital për vitet që ka. Haxhi Bajrami ishte i biri i vetëm i Sejdiut dhe njihet në këto anë si gjellëbërës i spikatur. Pothuajse nuk ka ngelur shtëpi në Opojë dhe Gorë ku nuk ka zier në dasmat e tyre haxhi Bajrami. Zanatin e tij prej gjellëbërësit e ka trashëguar nipi i madh Abdurrahmani por edhe nipërit tjerë dhe nga ky zanat realizojnë të ardhura edhe sot. Madje, gjellëtores së tyre në fshatin Bresanë ia kanë vendosur emrin “Haxhi Bajrami”!
Haxhi Bajrami, i njohur në popull si Bajram Dana për shkak se vjen nga lagjja Danaj, njëjtë si babai i tij ka vetëm një djalë (që është stërgjysh) – Haxhi Nexhmidin Abdurramanin të lindur më 04.03.1945…
Stërgjyshi i Edinit, Nexhmidin Abdurrahmani, ndonëse nuk e trashëgoi zanatin e babait të tij (është marrë me ndërtimtari deri në pensionim), është gjithashtu emër i njohur në trevën e Opojës. Nexhmidini u dallua si aktivist në fshat dhe ishte ndër iniciatorët dhe organizatorët e shumë aksioneve në të mirë të komunitetit, gjithnjë në baza vullnetare! Për dallim nga gjyshi Sejdiu dhe babai i tij Bajrami, të cilët kishin vetëm nga një djalë, Nexhmidini është baba i 7 djemve (Abdurrahman, Halim, Sejdi, Shefkat, Mirsat, Hesat dhe Sead), të gjithë të martuar dhe që janë bërë prindër, madje edhe gjyshër duke e quar në 24 numrin e meshkujve që jetojnë në familjen me 5 breza!
Gjyshi i Edinit, Abdurraman Abdurramani i lindur më 09.12.1962, është baba i tre djemve. Abdurrahmani është trashëgimtar i denjë i zanatit të gjyshit të tij Bajramit i cili që në moshë të re i është përkushtuar zanatit të gjellëbërësit duke e vazhduar traditën familjare.
Babai i Edinit, Sami Abdurramani i lindur më 08.02.1984, i takon brezit të katërt të familjes së Bajram Danës. Samiu është i martuar dhe përveç Edinit ka edhe një djalë më të vogël të quajtur Isa (3 vjeç). Samiu i cili gjendet me punë të përkohshme në Gjermani, është një nga stërnipërit më të dashur të haxhi Bajramit për faktin se i dha atij epitetin e katragjyshit, epitet ky të cilin e mban qe 7 vite, që nga lindja e Edinit! Dëshira e haxhi Bajramit është që të shkel në shekullin e dytë të jetës dhe ta martojë Edinin për ta përjetuar edhe brezin e gjashtë./Kosovarja.us
