Beyoncé mbështet Kamala Harris dhe të drejtat e abortit: “Si nënë, jam këtu për…”
Këngëtarja e njohur, Beyoncé, ka bërë një paraqitje të veçantë në një miting të kandidates demokrate Kamala Harris, duke u angazhuar për një nga çështjet më të rëndësishme për amerikanët: abortin. Në fjalën e saj, Beyoncé theksoi rolin e saj si nënë, duke u shprehur:
“Si nënë, ndiej thellësisht rëndësinë e mbrojtjes së të drejtave tona dhe të mundësive që kemi për të bërë zgjedhje për trupat tanë.Unë jam këtu si nënë”
Ajo u drejtua një turme prej rreth 30,000 njerëzish në stadiumin Shell Energy në Hjuston, duke inkurajuar të pranishmit të angazhohen në procesin zgjedhor:
“Për të gjithë burrat dhe gratë këtu, por edhe ata që na ndjekin përmes ekranit, ju them se na nevojitet zëri juaj. Duhet të votojmë!”
Ndërkohë, Kamala Harris, e cila u ngjit në skenë për të mbështetur fjalën e Beyoncé, paralajmëroi se një rikthim i Donald Trump në presidencë do të rrezikonte të drejtat e abortit në mbarë vendin. Kjo ngjarje theksoi rëndësinë e angazhimit politik në një kohë vendimtare për të drejtat e grave dhe çështje të tjera sociale në Shtetet e Bashkuara.
