Harry dëshiron të kthehet në Mbretërinë e Bashkuar, por ka diçka që e frikëson

Duka i Sussex-it dëshiron të kthehet në Mbretërinë e Bashkuar, por “nuk ndihet i sigurt”, tha ekipi i tij ligjor në Gjykatën e Lartë në seancën e parë kundër Ministrisë së Brendshme për mbrojtjen e tij nga policia në MB.

Princi Harry ka aplikuar për një rishikim gjyqësor të një vendimi të Home Office për të mos lejuar që ai të paguajë personalisht për mbrojtjen e policisë për veten dhe familjen e tij kur ata janë në Mbretërinë e Bashkuar.

Ai dëshiron të sjellë fëmijët e tij, Archie dhe Lilibet për vizitë, por ai dhe familja e tij “nuk mund të kthehen në shtëpinë e tij, sepse është shumë e rrezikshme”, tha një përfaqësues ligjor për Dukën.

“Ky pretendim ka të bëjë me faktin se Duka nuk ndihet i sigurt kur është në MB duke pasur parasysh masat e sigurisë të aplikuara ndaj tij në qershor 2021 dhe do të vazhdojnë të zbatohen nëse ai vendos të kthehet. Është e vetëkuptueshme që ai dëshiron të kthehet për të parë familjen dhe miqtë dhe për të vazhduar të mbështesë bamirësitë që i ka aq përzemër. Kjo është dhe do të jetë gjithmonë shtëpia e tij.”

Harry dhe Meghan humbën mbrojtjen policore të financuar nga taksapaguesit pas dorëheqjes si anëtarë të familjes mbretërore në fillim të vitit 2020.

Një përfaqësues ligjor i Harry-t tha më parë se Duka dëshiron ta financojë vetë sigurinë, në vend që të kërkojë nga taksapaguesit të paguajnë faturën. Sidoqoftë, Robert Palmer QC, për Ministrinë e Brendshme, i tha gjykatës se oferta e Harry-t për financim privat ishte “e pakonsiderueshme”.