Kushtonte 100 milionë dollarë, shkatërrohet vila luksoze e Gigi dhe Bella Hadid

Dikur pretendonte ta shiste për 100 milionë dollarë, por tani mega rezidenca e tij nuk ekziston më. Është fjala për babanë e motrave të famshme Hadid, Mohamed, të cilit iu shkatërrua vila luksoze për shkak se ka shkelur lejen e ndërtimit.

“Daily Mail” ka publikuar fotot nga shtëpia tashmë e kthyer në një grumbull rrënojash. Madje ky është një nga grumbullimet e rrënojave më të shtrenjta të krijuara ndonjëherë.

Hadid, babai i supermodeleve Gigi dhe Bella Hadid, e bleu parcelën në vitin 2011 dhe filloi me shpejtësi ndërtimin. Shtëpia prej gati 3 mijë metrash katrorë rrethohej nga shumë hektarë tokë e pemë.

Sipas “Daily Mail”, dimensionet e shtëpisë ishin shumë më të mëdha dhe me më shumë kate se sa lejojnë rregullat e qytetit. Ishin gjithashtu dyfishi i lejes që iu dha nga Departamenti i Ndërtimit.

Ndërkohë ishin fqinjët ata që e çuan Hadidin në gjykatë nga frika se prona mund të rrëshqiste në shpatin e pjerrët të kodrës dhe të shtypte shtëpitë e tyre poshtë.

Gjykata e Lartë e Kalifornisë hodhi poshtë ankesën e manjatit të pasurive të paluajtshme Hadid për të shqyrtuar çështjen e tij, për të anuluar vendimin për shembjen e shtëpisë verën e kaluar – duke e quajtur pronën një ‘rrezik të qartë dhe real’ për fqinjët e tij.

Shkatërrimi i ndërtesës kërkon pak kohë ekstra, kryesisht për shkak të pozicionit të saj në majë të kodrës.