Një ditë pasi mbushi 85-vjeç, vajza sjell poezinë-mesazh të Kadaresë

Besiana Kadare, vetëm dy ditë pasi i ati, Ismail Kadare festoi 85-vjetorin ka sjellë në kujtesë poezinë-mesazh “Koha e pamjaftueshme”. Duket se vargjet e poezisë qëndrojnë aktuale edhe sot, 21 vjet pas shkrimit të saj. Koha e pamjaftueshme për të qëndruar, për të ikur, për muzgun, një shenjë e pakuptueshme që bëhet për të gjithë, për të ardhur ajo, ikja. Një kohë e pakohë për poezinë e penën e Kadaresë. Kujtojmë se Besiana Kadare u zgjodh në vitin e kaluar si zëvendëspresidente e Asamblesë së OKB-së.

Koha e pamjaftueshme

S’kam kohë të harroj shumë gjëra

Që nga mendja ti nxjerr përjetë.

Për tragjikët e vjetër e shkrepëtimat

Do t’më duhen së paku dy vjet.

Dhe ndoshta po aq për Danten,

Për frëngjishten tok me plazhet po aq,

Ndoshta gratë do të jem duke fshirë

Kur muzgu do të afrohet ndërkaq.

Si udhëtari me peshë të tepërt

Para avionit që niset pas pak

I ngarkuar rëndshëm ende

Do t’afrohem te varri humbak.

Nga supet si ta heq këtë barrë?

Ku ta hedh këtë peshë, si?

Me të s’mund të zbres atje poshtë

Por as lart dot s’e lë kurrsesi.

I menduar gjer në çast të fundit

Nga mosthënia, nga pengu tragjik,

Një shenjë ndoshta të pakuptueshme

Do t’ju bëj të gjithëve e do ik.

Ismail Kadare, 1990/