Pema me dy yje e Eni Vasilit

Marrë nga Living

Si çdo fundvit, atmosfera festive ndihet sapo hapet dera e shtëpisë së gazetares së mirënjohur, Eni Vasili, e cila na fton brenda për të realizuar shërbimin fotografik të festave, me dy vogëlushet e saj, Sofi dhe Nikol. Gjithçka është në vendin e vet, derisa vijnë ato të dyja . Takohemi pas dy vjetësh dhe gjithçka ka ndryshuar, përveç Enit, që e gjej më në formë se kurrë. Vogëlushet Sofi dhe Nikol kam pasur fatin t’i takoja shumë të vogla, vetëm pesëmuajshe, atëherë kur gugatjet e tyre mbushnin shtëpinë dhe “Living” solli eksluzivisht kopertinën e parë me to, në dhjetor 2021.

Vogëlushet sot janë rritur, nuk janë më ato bebet e qeta, që arrije t’i komandoje me një të mbajtur në krah ose t’i hutoje me ndonjë lodër. Sot janë një “uragan” i vërtetë. Mes dëshirës për të eksploruar çdo gjë të mundshme, Sofi dhe Nikol janë të papërmbajtshme. Është mosha kur energjia dhe përkushtimi i Enit është në maksimum e megjithatë këtu qëndron edhe bukuria e një shtëpie plot zhurmë, me dy princesha të vogla, që duket sikur thyejnë magjinë e festave.

Edhe pse binjake, ato janë shumë të ndryshme, jo vetëm në pamje, por edhe në karakter. Lozonjare, çapkëne e të veshura festive me fustanet e kuqe dhe flokët e artë, Sofi dhe Nikol janë kartolina më e bukur e këtij fundviti. Përzgjedhja e fotove është paksa e vështirë, sepse ato ishin tërë kohën në lëvizje, kërkonin të preknin çdo gjë në pemë e të shijonin atmosferën në shtëpi, sipas mënyrës së tyre. Realizuam fotografi si dy vjet më parë, në të njëjtin pozicion e me të njëjtën veshje të Enit, me shpresën që kur të trokasim sërish në derë, Sofi dhe Nikol të dinë të pozojnë vetë.

Për Enin, të bijat janë dy mrekulli të vogla të cilat i kanë dhuruar forcën dhe gjallërinë, që vazhdojnë ta mbushin shpirtërisht si grua dhe nënë e mbi të gjitha për profesionin dhe përpjekjen e vazhdueshme për një gazetari të pastër.