Raya, heroina e re e Disney që përfaqëson 670 milionë njerëz

U deshën gati 90 vjet, por heroina e parë e Azisë Juglindore doli premiere të enjten. Raya është karakteri i “Raya dhe Dragoi i Fundit”. Raya udhëton në gjithë rajonin për të ribashkuar njerëzit e saj dhe përpiqet të shpëtojë botën. Por përveç mbajtjes së peshës së njerëzimit mbi shpatullat e saj, ajo ka një barrë tjetër për të mbajtur. Azia Juglindore është shtëpia e 11 vendeve dhe 673 milionë njerëzve. Ka me dhjetëra, në mos qindra kultura të ndryshme në këtë rajon dhe këtu shtrohet pyetja: Çfarë është një identitet i Azisë Juglindore dhe a mundet heroina e fundit e Disney ta mishërojë atë?

Silat dhe salakots

Filmi është vendosur në Kumandra një tokë fantazie që strehon pesë fise, secili prej tyre ka një kulturë të veçantë, të frymëzuar nga vende të ndryshme në Azinë Juglindore. Regjisori Don Hall i tha BBC-së se vendimi për të xhiruar në rajon ishte frymëzuar nga një udhëtim që ekipi i krijimit të filmit bëri atje pak kohë para. Filmi nuk zhvillohet në kronologjinë e sotme, por është një imagjinatë e asaj sesi dukej rajoni mijëra vjet më parë. Është e qartë se copa të Azisë Juglindore janë përshkruar përmes filmit. Raya mban një kapelë që duket si Salakot, një mbulesë tradicionale në Filipine, ndërsa teknika e saj e luftimit është frymëzuar nga Silat, formë e arteve marciale tradicionale që praktikohet zakonisht në Malajzi dhe Indonezi.