Rusi, bilanci përfundimtar i të shtënave me armë në një shkollë është 17 të vdekur dhe 24 të plagosur

Një person i armatosur hapi zjarr në një shkollë në Rusinë qendrore, duke vrarë 17 persona dhe duke plagosur 24 të tjerë, përpara se të qëllonte veten për vdekje, thanë autoritetet.

Të shtënat ndodhën në shkollën nr. 88 në Izhevsk, një qytet 960 kilometra (600 milje) në lindje të Moskës në rajonin Udmurtia.

Komiteti Hetues i Rusisë e identifikoi të armatosurin si Artyom Kazantsev 34-vjeçar, i diplomuar në të njëjtën shkollë. Ai kishte veshur një bluzë të zezë me “simbolet naziste”. Nuk janë bërë të ditura detaje rreth motiveve të tij të sulmit.

Qeveria e Udmurtia tha se 17 persona, përfshirë 11 fëmijë, u vranë në të shtënat. Sipas Komitetit Hetues të Rusisë, 24 persona të tjerë, përfshirë 22 fëmijë u plagosën gjatë sulmit.

Guvernatori i Udmurtia, Alexander Brechalov, tha se personi i armatosur, për të cilin ai tha se ishte regjistruar si pacient në një strukturë psikiatrike, vrau veten pas sulmit.

Zëdhënësi i Kremlinit Dmitry Peskov i përshkroi të shtënat si “një akt terrorist” dhe tha se presidenti rus Vladimir Putin u ka dhënë urdhrat e nevojshme autoriteteve përkatëse.

“Presidenti Putin vajton thellësisht për vdekjen e njerëzve dhe fëmijëve në shkollën ku ndodhi një akt terrorist”, u tha Peskov gazetarëve.

Shkolla edukon fëmijët nga klasa e parë deri në të 11-tën. Ajo është evakuuar dhe zona përreth saj është e rrethuar, tha guvernatori.

Garda Kombëtare e Rusisë tha se Kazantsev përdori dy pistoleta jo-vdekjeprurëse por të përshtatura për të gjuajtur plumba të vërtetë. Armët nuk ishin të regjistruara tek autoritetet.

Një hetim penal për ngjarjen ka nisur me akuzën e vrasjes së shumëfishtë dhe armëmbajtjes pa leje. Izhevsk, një qytet me 640,000 banorë, ndodhet në perëndim të maleve Ural në Rusinë qendrore. Apnews