Shënohet rekord i ri në lindshmërinë më të ulët në botë
Shkalla e lindshmërisë së Koresë së Jugut, tashmë më e ulëta në botë, ka rënë përsëri pavarësisht përpjekjeve të vendit për të rritur popullsinë në rënie.
Organi kombëtar i statistikave raportoi të mërkurën se shkalla e fertilitetit, ose numri mesatar i fëmijëve që një grua pret, ra në 0.78 në 2022 – nga 0.81 një vit më parë.
Vendet kanë nevojë për një normë lindshmërie prej 2.1 për të mbajtur një popullsi të qëndrueshme, në mungesë të emigracionit. Në rastet e emigracionit të lartë, shifra duhet të jetë më shumë.
Shkalla e lindjeve në Korenë e Jugut ka rënë që nga viti 2015 dhe vendi regjistroi më shumë vdekje sesa lindje për herë të parë në vitin 2020, një trend që ka vazhduar që nga ajo kohë.
Në vitin 2022, vendi regjistroi rreth 249,000 lindje dhe 372,800 vdekje.
Rënie të ngjashme demografike po shihen në disa vende të tjera aziatike, përfshirë Japoninë dhe Kinën, duke ngritur shqetësime se do të ketë shumë pak njerëz në moshë pune për të mbështetur popullsinë e moshuar.
Ndërkohë, edhe gratë koreane po bëjnë fëmijë më vonë në jetë. Mosha mesatare e lindjes së fëmijëve në Korenë e Jugut ishte 33.5 vjeç vitin e kaluar.
Koreja e Jugut shpenzoi 200 miliardë dollarë për t’i nxitur njerëzit të sjellin më shumë fëmijë në jetë, por as këto politika nuk i nxitën mjaftueshëm.
Ekspertët thonë se arsyet për këto ndryshime demografike në të gjithë rajonin përfshijnë kulturat e punës, stanjacionin e pagave, rritjen e kostove të jetesës, ndryshimin e qëndrimeve ndaj martesës dhe barazisë gjinore dhe rritjen e zhgënjimit të brezave të rinj.
Por pavarësisht faktorëve ekonomikë në lojë, hedhja e parave për problemin ka rezultuar joefektive. Shtatorin e kaluar, presidenti i Koresë së Jugut, Yoon Suk Yeol, pranoi se më shumë se 200 miliardë dollarë janë shpenzuar në përpjekje për të rritur popullsinë gjatë 16 viteve të fundit.
Qeveria e Koresë së Jugut ka prezantuar iniciativa të ndryshme si zgjatja e lejes së atësisë me pagesë, ofrimi i “kuponave të foshnjave” për prindërit e rinj dhe fushata sociale që inkurajojnë burrat të kontribuojnë në kujdesin e fëmijëve dhe punët e shtëpisë.
Por ekspertët thonë se nevojitet më shumë mbështetje gjatë gjithë jetës së një fëmije – si dhe ndryshime në disa çështje të rrënjosura sociale. Për shembull, shoqëria e Koresë së Jugut ende nuk e lejon trajtimin IVF për gratë beqare.
