14-vjeçari përfundon kolegjin dhe punësohet në SpaceX

Kairan Quazi e ka të pamundur ligjërisht të blejë një pije alkoolike, por është gati të marrë një diplomë kolegji dhe të fillojë punë në SpaceX.

Historia e Kairan-it është bërë virale pasi mediat në Kaliforni raportuan për përgatitjen e tij për t’u diplomuar në Santa Clara University më 17 qershor.

Ai jo vetëm që do të bëhet i diplomuari më i ri në historinë 172-vjeçare të shkollës, por gjithashtu do t’i bashkohet një liste të shkurtër të njerëzve që kanë mbaruar kolegjin në fëmijërinë e tyre.

Familja e Kairan-it e zbuloi për herë të parë inteligjencën e tij të përparuar kur filloi të fliste me fjali të plota kur ishte vetëm 2 vjeç. Ai dëgjonte radion dhe fliste me mësuesit dhe shokët e klasës për historitë që dëgjonte.

Më pas, në klasën e tretë, Kairan bëri disa teste që treguan se kishte inteligjencë shumë më të përparuar se bashkëmoshatarët e tij.

Mësuesit, pediatri dhe prindërit arritën në përfundimin se arsimimi i zakonshëm nuk ishte rruga e duhur për të. Më pas ai u regjistrua në kolegjin Las Positas, ku punoi gjithashtu si mësues dhe u transferua në Santa Clara për të studiuar shkenca kompjuterike dhe inxhinieri dy vjet më vonë, kur ishte 11 vjeç.

Kohët e fundit, Kairan dha një intervistë pune në Starlink, një platformë e internetit satelitor e operuar nga kompania amerikane e hapësirës ajrore SpaceX, e themeluar nga Elon Musk.

Kairan tha për Times se e kishte me shumë dëshirë të ishte pjesë e Starlink, sepse do të mundësonte që të ishte pjesë e diçkaje më të madhe se ai.

“Shpresoj se mund t’ua hap derën më shumë njerëzve si unë,” tha ai.

Burimet: Los Angeles Times, Guardian