E moshuara në Fier vdes nga i ftohti, flet vëllai i saj: “I kishin ndërprerë energjinë elektrike”

Një ngjarje e rëndë ka ndodhur së fundmi në Fier.

Një 67-vjeçare nga fshati Ferras i Fierit ka humbur jetën mbrëmjen e së enjtes, teksa jetonte prej shumë vitesh në kushte tejet të mjerueshme

Viktima, e identifikuar si Liljana Sema jetonte në varfëri ekstreme në një kasolle.

Ajo ishte nënë e 3 fëmijëve, dy djem dhe një vajze dy prej tyre emigrant në Itali kurse djali i vogël punonte në Sarandë, ndërsa bashkëshorti i ishte ndarë nga jeta vite më parë.

Pikërisht në këto ditë të acarta, ajo është gjetur e vdekur në banesën e saj nga vëllai i saj, Florenc Gjoleka, pasi vetëm pak ditë më parë asaj i ishte prerë furnizimi me energji elektrike nga OSHEE-ja, duke e lënë për pasojë pa ngrohje, vetëm sepse e moshuara nuk kishte paguar një muaj tarifën e energjisë.

Liljana, vuante prej vitesh nga zemra, tensioni dhe probleme të tjera me nervat, por kësaj i është mbivendosur prej shumë vitesh edhe varfëria ekstreme, skamja, uria dhe mungesa e të ardhurave minimale për të mbajtur shpirtin gjallë.