Pas ndarjes, Natalie Portman flet për dashurinë e re & mëmësinë në moshën 45-vjeçare
Natalie Portman ka folur për marrëdhënien e saj me muzikantin Tanguy Destable, i njohur artistikisht si Tepr, në një intervistë për revistën Harper’s Bazaar. Aktorja ndau disa mendime të rralla për jetën me partnerin, vetëm pak javë pasi mirëpritën fëmijën e tyre të parë së bashku.
Gjatë intervistës, 45-vjeçarja u pyet nëse të qenit në një lidhje në një moshë kur e njeh më mirë veten ndihet ndryshe dhe më bukur. “Po”, u përgjigj ajo.
Intervista u zhvillua në ekspozitën e parë personale në Francë të artistes amerikane Joan Snyder. Duke folur për pikturat e saj, Portman tregoi se e kishte prekur fakti që një artiste në të 80-at mund të krijonte një vepër thjesht nga dashuria për nipin e saj.
“Po mendoja sa bukur është të shohësh një artiste në të 80-at që thotë: ‘Do ta bëj këtë për dashurinë ndaj nipit tim’. Kur ne pyesnim se çfarë kuptimi kishte, përgjigjja ishte se e kishte bërë për të, sepse e donte. Mendova: kështu është një grua e fortë, që ka jetuar dhe ka përvojë. Gjëja më e rëndësishme është dashuria dhe nuk kam turp ta them”, u shpreh aktorja.
Portman foli më pas për mënyrën si e sheh sot jetën dhe marrëdhënien e saj.
“Mendoj se gjithçka është kaq e thjeshtë: të jesh i sjellshëm, të duash dhe të jesh në gjendje të qeshësh. Kaq ka rëndësi. Kjo është bukuria e të qenit në këtë moshë. Nëse nuk është kështu, nuk e shpenzoj kohën time aty”, tha ajo.
Aktorja ndau gjithashtu emocionet e saj si nënë e një foshnjeje. Fëmija i saj dhe Destable erdhi në jetë në gusht, ndërsa Portman e përshkroi këtë përvojë si një burim të madh mrekullie dhe gëzimi.
“Jam plot habi dhe gëzim për këtë qenie të vogël magjike”, tha ajo.
Sipas aktores, ardhja e foshnjës e ka bërë të shohë ndryshe edhe fëmijët e saj më të mëdhenj. Kjo përvojë i kujton se sa pak kohë ka kaluar që kur edhe ata ishin foshnja dhe sa shpejt janë rritur, duke u shndërruar në njerëz të jashtëzakonshëm, me personalitetet, sensin e humorit dhe idetë e tyre.
Portman është gjithashtu nënë e Aleph-it, i lindur në qershor të vitit 2011, dhe Amalia-s, e lindur në shkurt të vitit 2017, nga martesa e mëparshme me Benjamin Millepied.
Aktorja dhe Millepied u ndanë në vitin 2023, ndërsa divorci i tyre u përfundua në vitin 2024. Portman dhe Destable konfirmuan lidhjen e tyre në mars të vitit 2025.
