Influencuesja promovon zbardhuesin si “kurë” për autizmin, prindërit flasin për pasoja të rënda tek fëmijët

Një influencuese amerikane, Kerri Rivera, ka shkaktuar polemika të forta pasi ka promovuar përdorimin e dioksidit të klorit, një zbardhues industrial, si trajtim për fëmijët me autizëm. Ajo pretendon se autizmi shkaktohet nga “krimba dhe parazitë” dhe i siguron ndjekësit se simptomat shqetësuese, si të vjella, skuqje apo kriza, janë shenja që kurimi po funksionon.

Prindër të shqetësuar, që kanë ndjekur udhëzimet e saj, raportojnë për probleme serioze shëndetësore tek fëmijët, ndërsa ekspertët paralajmërojnë se substanca e përdorur mund të shkaktojë dëmtime të rënda në organizëm, përfshirë djegie të brendshme, dëmtim të zorrëve dhe madje edhe shok hipovolemik.

Autoritetet shëndetësore në Britani kanë nënvizuar rreziqet e mëdha që vijnë nga gëlltitja e këtij kimikati. Ndërkohë, TikTok ka mbyllur llogarinë e saj, ndërsa Meta është vënë në dijeni të rastit. Autizmi, sipas komunitetit shkencor, është një gjendje neurologjike që nuk shkaktohet nga infeksione apo parazitë dhe nuk ka kurë për të.

Përdorimi i zbardhuesit si trajtim përbën jo vetëm një rrezik të drejtpërdrejtë për shëndetin, por edhe një akt të rrezikshëm manipulimi ndaj familjeve në kërkim të ndihmës.