”Mami, dua të të shoqëroj në altar”, dëshira e fundit e 12-vjeçarit me kancer që përloti rrjetet sociale

E dinte shumë mirë se nuk kishte më kohë, sëmundja kishte avancuar në mënyrë të frikshme mbi trupin e tij të njomë dhe çdo seancë kimioterapie ishte thjesht një hap më larg fundit, e megjithatë 12-vjeçari Keith Burkett kishte vetëm një ëndërr: të shoqëronte mamanë e tij në altar para se të ndërronte në jetë. Vuante, por në të njëjtën kohë ishte i lumtur sepse në një moshë fare të vogël ai kishte marrë përgjegjësinë e ‘’burrit’’ të familjes dhe po bënte mamanë e tij të lumtur.

Historia e mëposhtme është një histori dashurie, dhimbjeje dhe sakrificash që vetëm lidhja e ngushtë prind-fëmijë mund të dhurojë. Keith Burkett ishte vetëm 6 vjeç, kur u diagnostikua për herë të parë me sarkomë, një lloj kanceri malinj që zhvillohet në indet lidhëse, dhe mund të prekë çdo pjesë të trupit. Sarkoma quhet shpesh ‘’kancer i indeve të buta’’ dhe zhvillohet kryesisht në duar dhe këmbë, por edhe në muskuj, enët e gjakut, tendinat, indet fijore përreth nyjeve etj.

Djaloshi amerikan nga Ohio, kishte kaluar 3 vite e fundit të jetës së tij në shtratin e një spitali në Stow, duke luftuar sëmundjen e vështirë me të cilën bashkëjetonte që i vogël, megjithatë nuk ia kishte dalë dot. Në luftën e tij me sëmundjen, ai kishte gjithmonë pranë mamanë Taylore, të cilën donte ta bënte të lumtur për herë të fundit.

Vetëm tre ditë para se të ndahej nga jeta, Keith arriti të realizonte ëndrrën e tij dhe të shoqëronte në latar. Ceremonia e veçantë u zhvillua brenda ambienteve të spitalit ku ai vuante prej kohësh dhe fotot e saj janë shpërndarë mbi 20 mijë herë në rrjete sociale.