Modelja shqiptare në pritje të ëmbël, Kleofina Pnishi konfirmon shtatzëninë me futbollistin francez Benjamin Pavard

Modelja shqiptare Kleofina Pnishi dhe futbollisti francez Benjamin Pavard, do bëhen prindër për herë të parë.

 

Lajmin e ëmbël e ka konfirmuar vetë modelja, e cila ka ndarë në rrjetet sociale një video ku shfaqet krah partnerit të saj, duke nxjerrë në pah barkun e rrumbullakosur.

Me këtë publikim, Kleofina ka konfirmuar zyrtarisht zërat se është në pritje të ëmbël, ndërsa çifti duket i lumtur për kapitullin e ri që po nis në jetën e tyre.

Modelja shqiptare dhe kampioni francez i dhanë fund beqarisë në korrik 2025, gjatë një ceremonie në Abacinë e Trinisë së Shenjtë në Cava de’ Tirreni, Itali.

Po ashtu, Kleofina ka rrëfyer detaje nga romanca e saj me Pavard, nga propozimi për martesë, te takimi i futbollistit me babain e saj.

“Propozimi për martesë ka ndodhur 1 muaj pas takimit me babin. Ishim në Sarandë, një ditë para ditëlindjes sime. Ishte shumë bukur, vetëm ne të dy në plazh, vëllai, motra dhe shoqëria që erdhën në Shqipëri për ditëlindjen time ishin spektatorë.

Edhe pse e ndjen që po vjen ai moment, emocioni është i njëjtë. Nuk mundesh të paralajmërosh trurin se si do të ndihesh kur një person të propozon të kalosh jetën me të, kam qarë, një emocion shumë i bukur”, rrëfeu ajo.

Modelja shqiptare theksoi se nëse babai i saj nuk do të ishte dakord, do merrte vendimin për ndarjen nga Benjamin Pavard.

“Momenti më i bukur ishte fakti që babai im e donte personin që po merrja, po më jepte një bekim të sinqertë dhe jo thjesht të më bënte qejfin.

Ishte shumë e rëndësishme, s’më duhet jeta nëse nuk janë të kënaqur me vendimet e mia. Nëse s’do kishte pranuar, do ishte ndarë, edhe pse e dua. Babi është shumë i rëndësishëm për mua”, u shpreh Kleofina.

Sa i përket dasmës, rrëfeu se ishin 190 persona të ftuar, ku shumica prej tyre shqiptarë.

Ajo shtoi se dasma zgjati 3 ditë dhe kushtoi 1 milionë euro, shpenzime të paguara nga Benjamin Pavard.

“3 muaj para dasmës e vendosëm vendin në Malfy, kishim 190 persona të ftuar, shumë shqiptarë dhe shumë më pak francezë. Unë kam fluturuar në dasmën time, është diçka që dua ta rijetoj me të njëjtin person, ndjenjë shumë e mirë. Kërcen valle, e do shumë muzikën shqiptare. Kam pasur 6 fustane, për 3 ditë”, tregoi modelja në “Mirëmbrëma Yje”.

Gjithashtu ajo foli edhe për planet për t’u bërë nënë, duke u shprehur se: “Unë e dua një fëmijë, normalisht edhe ai, besoj se është plani. Shpresoj të kemi fatin të bëhemi prindër, edhe pse nuk është në dorën tonë. E do djalë, ka shumë tipare të shqiptarëve, është xheloz, gjithçka duhet t’ia gjej unë.”