Në këtë shtet aborti shpallet i paligjshëm nga Gjykata

Gjykata e Lartë në Poloni i ka shpallur abortet për shkak të defekteve fetale anti-kushtetuese, duke e bërë kështu abortin në vend pothuajse të paligjshëm, vendim që ka sjellë protesta në kryeqytetin Varshavë.

Shteti, i cili në fakt kishte disa nga ligjet më strikte të abortit në Europë, tani do të lejojë procedurën të bëhet vetëm në rastet e incestit, përdhunimit ose nëse jeta e nënës është në rrezik si pasojë e shtatzanisë. Lëvizja që ligji për abortin të ashpërsohej edhe më shumë, është nisur nga qeveria populiste e Polonisë prej muajsh dhe ka ngritur alarmin mes grave që luftojnë për të drejtat e tyre dhe për të drejtat e njeriut,

Rreth 98% e aborteve në Poloni janë bërë për shkak të defekteve fetale të fëmijëve, që do të thotë se ligji i ri i jep fund pothuajse të gjitha rasteve kur kjo procedurë lejohet të bëhet. Pra një grua duhet ta mbajë fëmijën edhe nëse e di që ai nuk do t’i mbijetojë lindjes. Të paktën kështu shkruajnë media polake.

Vendimi është dënuar nga Komisionerja e të Drejtave të Njeriut në Këshillin e Europës, Dunja Mijatovic, e cila e quajti ditën kur u miratua vendimi si “një ditë të trishtë për të gjitha gratë”. Në fakt propozimi i qeverisë konservatore u rrëzua nga Parlamenti, por është miratuar nga gjykata më e lartë e Polonisë. Me qindra persona u mblodhën në shtëpinë e kryetarit të një prej partive në pushtet, PiS, Jaroslaw Kaczynski, i cili konsiderohet si nismëtar i lëvizjes, pavarësisht se nuk është as kryeministër dhe as president.

(AP Photo/Czarek Sokolowski)
(AP Photo/Czarek Sokolowski)

Kjo nuk është hera e parë që në Varshavë bëhen të tilla protesta për të ndaluar vendimin për abortin, që gjatë viteve ka qenë shumë herë në diskutim, megjithatë këtë herë arriti të miratohet.

Share With:
Translate »
296 Views