Nis gjyqi për vrasjen e Martin Canit – Nëna kërkon seanca publike: “Populli të dijë çfarë ndodhi”

Tiranë – Ka nisur në Gjykatën e Tiranës procesi gjyqësor ndaj Mario Përlleshajt, të miturit të akuzuar për vrasjen e 14-vjeçarit Martin Cani. Seanca paraprake, e cila ishte planifikuar të zhvillohej këtë të hënë në orën 13:00, u shty për 27 mars, për shkak të mungesës së një dëshmitari kyç, shokut të viktimës që mbeti i plagosur në të njëjtën ngjarje.

Në gjykatë ishin të pranishëm edhe prindërit e Martin Canit, të cilët mbërritën të kapur dorë për dore. Nëna e tij, Florina Cani, kërkoi që gjyqi të zhvillohet me dyer të hapura, në mënyrë që opinioni publik të mësojë të vërtetën.

“Edhe fëmija im të bëhet simbol për fëmijët e tjerë. Mos të ndodhë tek asnjë familje kjo tragjedi që më ndodhi mua”, tha ajo për gazetarët.

Vrasja që tronditi Tiranën

Ngjarja e rëndë ndodhi më 18 nëntor 2024, vetëm 200 metra larg shkollës “Fan Noli”, pas një konflikti mes adoleshentëve, i cili kishte nisur disa ditë më parë brenda ambienteve të shkollës. Sherri mes Martinit dhe Marios nisi në tualetet e shkollës, ku ata u përballën fizikisht, por u ndanë nga roja i sigurisë. Megjithatë, tensioni u rindez pas mësimit, kur dy grupet e adoleshentëve u takuan jashtë shkollës.

Konflikti eskaloi në përplasje fizike, ku Mario Përlleshaj nxori një thikë, duke goditur për vdekje Martin Canin dhe duke plagosur një tjetër bashkëmoshatar. Pas sulmit, edhe vetë i dyshuari u vetëplagos, ndërsa tentoi të fshehë armën e krimit, e cila u gjet disa ditë më vonë nga policia.

Akuzat ndaj të miturit

14-vjeçari Mario Përlleshaj ndodhet në institucionin e të miturve në Kavajë, ku po mbahet nën masën e sigurisë “Arrest në burg”. Ai akuzohet për “vrasje në rrethana cilësuese ndaj një të mituri”, një akuzë e rëndë që mund të sjellë një dënim maksimal për të, pavarësisht moshës së tij.

Seanca e radhës për këtë çështje është caktuar për 27 mars, ora 13:30, ku pritet të dëshmojnë dëshmitarët kryesorë dhe të paraqiten prova të reja për zbardhjen e plotë të ngjarjes që tronditi kryeqytetin.