Numri i vdekjeve të parakohshme të foshnjave në rritje, mjekët me këshilla për prindërit

Vdekja e papritur e foshnjave, e njohur ndryshe si SIDS, ka shtuar numrin e viktimave, paralajmërojnë mjekët.

Megjithëse nuk ka ndonjë shpjegim shkencor në lidhje me ndodhinë e këtyre vdekjeve apo preventimin një herë e përgjithmonë të tyre, mjekët kanë ofruar disa këshilla, që sipas tyre, mund të jenë të vlefshme për zbutjen e rrezikut nga SIDS.

1- Vendoseni gjithmonë të flejë me shpinë.

Fëmija duhet të flejë gjithmonë me barkun lart, të paktën derisa ai të jetë në gjendje të rrotullohet pa ndihmën e dikujt ( rreth moshës 1-vjeçare ). Mos i vendosni batanije apo mbështetëse të tjera për ta mbajtur në pozicionin e duhur, pasi ato natën mund të spostohen dhe te bllokojnë rrugët e frymëmarrjes së fëmijës.

2- Veshja duhet të përbëhet prej vetëm një tute të hollë.

Gjatë gjumit fëmija nuk duhet të vishet me shumë rroba. Mjafton një trupore ose tutë e hollë. Ju duhet të përdorni batanije të përshtatshme për masën e fëmijës, të cilat nuk duhet të jenë të rënda. Idealja do të ishte përdorimi i batanijeve “thes”, të cilat nuk do të rrezikojnë bllokimin e rrugëve të frymëmarrjes.

3- Dysheku nuk duhet të jetë shumë i butë.

Sigurohuni që dysheku të jetë i fortë dhe i përshtatshëm për krevatin apo djepin ku fle fëmija. Një shtrat shumë i butë mund të ndikojë në bllokimin e frymëmarrjes së fëmijës.

4- Këmbët e fëmijës duhet të prekin fundin e krevatit.

Në këtë mënyrë ju do të jeni më të sigurt që fëmija nuk do të futet poshtë çarçafëve. Batanija duhet të jetë e hollë dhe nuk duhet të vendoset më lart se sqetullat.

5- Ambienti ku fle fëmija nuk duhet të jetë shumë i nxehtë.

Temperatura e dhomës duhet të jetë gjithmonë rreth 20 gradë.

6- Në djepin apo krevatin e fëmijës duhet të jetë vetëm ai.

Në krevatin e fëmijës nuk duhet të ketë asgjë tjetër përveç fëmijës. Mos vendosni atje arushë dhe lodra të tjera, jorganë, jastëkë etj. Vendosja e lodrave brenda krevatit mund të jetë diçka e bukur për t’u parë por e rrezikshme për fëmijën.

7- Ndani me të dhomën por jo krevatin.

E mbani fëmijën për të fjetur në dhomën tuaj, por jo në krevatin tuaj. Vendoseni djepin apo krevatin e fëmijës pranë tuajit në mënyrë që ta kontrolloni më me lehtësi. Ndërsa i jepni gji ju mund ta merrni në krevatin tuaj, por më pas duhet ta vendosni sërish tek i veti.

8- Ushqyerja me gji.

Sipas një studimi fëmijët të cilët janë ushqyer me gji, qoftë edhe për një periudhë të shkurtër kohore, janë më pak të rrezikuar nga SIDS.