Pas 4 vitesh, familja mbretërore pati një takim që dukej i pamundur

Më në fund ndodhi: mbreti Charles është takuar me nipërit e tij, princin Archie dhe princeshën Lilibet, për herë të parë që nga viti 2022, pas një periudhe të gjatë tensionesh dhe pengesash.

Sipas People, Meghan Markle udhëtoi në Mbretërinë e Bashkuar së bashku me dy fëmijët e saj, ndërsa princi Harry ndodhej tashmë atje për angazhimet e tij. Takimi me mbretin u zhvillua në Highgrove House, rezidenca e tij në fshat, dhe u mbajt plotësisht privat.

Nuk janë publikuar fotografi apo detaje nga vizita, pasi  familja vendosi ta mbajë larg vëmendjes së publikut.

Kjo ishte hera e parë që Archie dhe Lilibet panë gjyshin e tyre që nga viti 2022, kur udhëtuan në Britani me prindërit për festimet e Jubileut të Platinit të Mbretëreshës Elizabeth II. Më vonë po atë vit, Meghan dhe Harry u kthyen në vend për funeralin e mbretëreshës.

Takimi i shumëpritur rrezikoi të mos realizohej për shkak të çështjeve të sigurisë. Mediat britanike raportuan se kërkesa e Harry-t dhe Meghan-it për mbrojtje të plotë gjatë gjithë qëndrimit të tyre në Britani ishte refuzuar, ndaj Harry kërkoi me urgjencë alternativa që familja të mund të udhëtonte, qoftë edhe për vetëm 24 orë. Siguria e garantuar ishte e vlefshme vetëm brenda rezidencave mbretërore.

Pak ditë para takimit, burime pranë familjes mbretërore lanë të kuptohej se Harry shpresonte ende për një ribashkim familjar.

“Edhe pse asgjë nuk ishte konfirmuar, bisedimet vazhdonin”, tha një burim.

Një tjetër shtoi se mbreti Charles nuk do ta humbiste mundësinë për të kaluar kohë me nipërit e tij dhe se, nëse do të gjendej një mënyrë për ta bërë të mundur takimin, ai do ta pranonte.