‘Të qoftë i lehtë dheu i Kosovës’, Leonora kujton babain në 28-vjetorin e ndarjes nga jeta

Këngëtarja e njohur shqiptare, Leonora Jakupi, ka ndarë me ndjekësit e saj në Instagram disa imazhe tejet emocionale dhe plot kujtime.

Përmes disa postimeve në InstaStory, ajo ka përkujtuar të atin, Qazim Jakupin, i cili plot 28 vite më parë ra dëshmor për lirinë e Kosovës.

Leonora ka përzgjedhur tri fotografi mjaft domethënëse për të nderuar figurën e tij, duke i shoqëruar ato me dedikime tejet të ndjera që përcjellin dhimbjen, por edhe krenarinë e madhe që ndjen familja.

Në një fotografi të vjetër bardhezi, ku prindërit e saj shihen krah njëri-tjetrit në rininë e tyre, këngëtarja ka shprehur mallin e pashuar me këto fjalë:

“Sa mall kam për ty, engjëlli im babë”

Një tjetër imazh tejet i fuqishëm është portreti i tij me uniformën e Ushtrisë Çlirimtare të Kosovës (UÇK).

Krahas kësaj fotografie heroike, ajo ka ndarë një mesazh prekës që dëshmon lidhjen e tyre të pathyeshme shpirtërore:

“Ditët e vitet kalojnë e ti vazhdon të mbetesh i freskët në kujtimet e mija.. dora jote akoma përkëdhel flokun tim nga lart! Ti, heroi im, të qoftë i lehtë dheu i Kosovës!”

Për ta përmbyllur këtë përkujtim, Leonora ka publikuar edhe një pamje nga varri i të atit, i cili shihet i mbuluar me një rregullim të bukur me lule të freskëta të bardha.

Mbi këtë imazh, ajo ka shkruar:

“Sot 28 vite pa ty, babë, ti mburrja dhe krenaria jonë!”

Edhe pas gati tri dekadash, dhimbja për humbjen e njeriut të shtrenjtë mbetet e pranishme, por ajo gjithmonë tejkalohet nga krenaria e pamatshme për sakrificën e tij sublime. /Prive By Liberta Spahiu