Po planifikoni të lindni beben në Amerikë? Trump sapo firmosi dy urdhra të rinj kundër “turizmit të lindjeve”
Presidenti amerikan, Donald Trump ka ndërmarrë një tjetër përpjekje për të kufizuar shtetësinë automatike për personat e lindur në SHBA-të. Vendimi vjen disa javë pasi Gjykata Supreme rrëzoi nismën e tij të parë për t’u mohuar këtë të drejtë fëmijëve të emigrantëve pa dokumente dhe të atyre me qëndrim të përkohshëm.
Trump firmosi të enjten (6 gusht), dy urdhra ekzekutivë që synojnë të zgjerojnë kategoritë e fëmijëve që nuk do të përfitojnë automatikisht shtetësi amerikane dhe të ndalojnë të ashtuquajturin “turizëm të lindjeve”. Urdhrat pritet të përballen me sfida ligjore në gjykata.
Kufizimi i shtetësisë për lindje ka qenë prej kohësh një objektiv i Trump dhe një nga pikat kryesore të politikës së tij të ashpër ndaj emigracionit gjatë mandatit të dytë presidencial. Deri tani, përpjekjet e tij kanë dështuar.
Duke komentuar vendimin e Gjykatës Supreme, Trump e cilësoi atë si “shumë të pafavorshëm” dhe tha se administrata e tij po bën ndryshime sepse, sipas tij, situata është “e padrejtë”.
Një nga urdhrat e rinj synon të zgjerojë përkufizimin e fëmijëve që nuk do të përfitojnë nga shtetësia automatike.
Historikisht, përjashtimet nga klauzola e shtetësisë në Amendamentin e 14-të të Kushtetutës amerikane kanë përfshirë fëmijët e lindur në SHBA-të nga diplomatë të huaj, forca pushtuese të huaja, persona të lindur në anije të huaja dhe disa kategori të popullsisë indigjene.
Stephen Miller, zëvendës shefi i stafit në Shtëpinë e Bardhë dhe një nga arkitektët kryesorë të politikave kundër emigracionit të Trump, tha se urdhri synon të përfshijë edhe fëmijët e personave që janë pjesë e “organizatave të huaja terroriste” dhe kategori të tjera personash që veprojnë në emër të qeverive të huaja.
Urdhri kërkon gjithashtu zgjerimin e përjashtimeve për fëmijët e lindur nga punonjës të qeverive të huaja dhe përmend persona të lindur në territore amerikane ku shtetësia nuk jepet automatikisht me ligj federal. Aktualisht, kjo kategori prek vetëm Samoan Amerikane.
Një tjetër dispozitë synon t’u mohojë shtetësinë automatike fëmijëve, prindërit e të cilëve “kanë kryer veprime mashtruese për të përfituar shtetësi”.
Urdhri i dytë fokusohet te “turizmi i lindjeve”, praktikë ku persona udhëtojnë në SHBA-të me synimin për të lindur fëmijën në mënyrë që ai të marrë shtetësinë amerikane.
Trump pretendoi pa paraqitur prova se “qindra mijëra” persona kanë përdorur këtë praktikë. Sipas të dhënave të Institutit për Politikat e Migracionit, vlerësimi më i lartë i bazuar në të dhënat e regjistrimit tregon rreth 22 mijë deri në 26 mijë lindje në vit nga “turizmi i lindjeve”, ndërsa të dhënat qeveritare raportojnë rreth 9 mijë e 600 lindje në vitin 2024 nga nëna me adresa të huaja. Kjo përbën më pak se 1% të të gjitha lindjeve në SHBA-të.
Urdhri i dytë udhëzon agjencitë federale të synojnë operatorët që organizojnë udhëtime të tilla drejt SHBA-ve.
Udhëtimi në SHBA me pretendimin se bëhet për turizëm, ndërsa qëllimi real është lindja e një fëmije për të marrë shtetësinë, konsiderohet tashmë shkelje e rregullave të vizave dhe është i paligjshëm.
Urdhrat e rinj të Trump pritet pothuajse me siguri të sfidohen në gjykata. Më 30 qershor, Gjykata Supreme rrëzoi urdhrin e tij të parë të firmosur në ditën e inaugurimit, duke riafirmuar se Kushtetuta amerikane u garanton shtetësi pothuajse të gjithë personave të lindur në territorin e SHBA-ve.
Administrata Trump synon tashmë të testojë kufijtë e këtij vendimi, duke argumentuar se disa kategori personash nuk përfshihen në garancinë e Amendamentit të 14-të.
Unioni Amerikan për Liritë Civile (ACLU) e kritikoi vendimin, duke e cilësuar si një tjetër përpjekje antikushtetuese për të ndryshuar rregullat e shtetësisë për lindje.
“Gjykata Supreme e ka vendosur tashmë këtë çështje: shtetësia për lindje garantohet nga Kushtetuta. Asnjë urdhër ekzekutiv nuk mund të ndryshojë kuptimin e saj”, tha Cody Wofsy, zëvendësdrejtor i projektit për të drejtat e emigrantëve në ACLU.
