Ben Affleck pranon se grindet me lojtarët në Fortnite, aktori nuk e përballon dot humbjen përballë fëmijëve

Ben Affleck ka rrëfyer se shpesh përfundon duke u grindur me lojtarë të tjerë gjatë lojës Fortnite, madje edhe me fëmijë, pasi nuk e përballon lehtë faktin që ata e mposhtin.

Aktori 54-vjeçar e ndau këtë histori gjatë një bisede në podkastin New Heights, të drejtuar nga vëllezërit Travis dhe Jason Kelce. Ai tregoi se nisi të luante Fortnite pasi djali i tij adoleshent u fiksua pas kësaj loje.

 Duke menduar se përvoja e mëparshme me lojëra si Madden dhe videolojërat me qitje do t’i jepte avantazh, Affleck u përball shpejt me realitetin, shkruan DailyMail.

Sipas tij, lojtarët më të rinj e mposhtnin menjëherë dhe më pas talleshin me të për aftësitë e tij

Aktori pranoi me humor se në këto situata përfundon duke u përfshirë në debate dhe duke përdorur fjalë të pista, ndërsa përpiqet t’u tregojë kundërshtarëve se është një burrë i rritur dhe jo një lojtar i paaftë.

Affleck ka tre fëmijë me ish-bashkëshorten Jennifer Garner: Violet, 20 vjeç, Fin, 17 vjeç dhe Samuel, 14 vjeç.

Së fundmi, aktori ka folur edhe për marrëdhënien me fëmijët dhe përpjekjet e tij për të kuptuar botën e tyre dixhitale. Ai ka zbuluar se nuk dëshiron të jetë aktiv në rrjetet sociale, duke e cilësuar veten si një ndikues të tmerrshëm.

Në një intervistë për Variety, Affleck tregoi se ishte bllokuar dy herë nga Instagrami, pasi kishte krijuar llogari me vetëm gjashtë ndjekës, mes tyre fëmijët dhe disa nga miqtë e tyre.

Ai shpjegoi se qëllimi i tij ishte të ndiqte aktivitetin e fëmijëve në rrjetet sociale, ndërsa nuk sheh arsye për të pasur një profil publik.