Fatma ka një status motivues që do t’ju ndihmojë t’i ktheheni normalitetit pas tërmetit
Pas tërmetit që goditi Shqipërinë më 26 nëntor shumë nga ne mendojmë me vete: A do të mund të rikthehemi në normalitet? Ishte një situatë e vështirë dhe e papritur, me shumë dhimbje për ata persona që humbën jetën tragjikisht nën rrënoja. Kudo nëpër media, rrjete sociale shkruhet për këtë gjë. Mirëpo, ka edhe nga ata njerëz që i gëzohen faktit që janë gjallë dhe kanë vazhduar jetën normalisht dhe publikojnë foto në rrjetet sociale. Ka edhe nga ata të tjerë që i paragjykojnë, pasi mendojnë se duhet të solidarizohen me dhimbjen e personave të prekur.
Në fakt jeta duhet të vazhdojë dhe të gjithë duhet të mundohemi të kthehemi në normalitet dhe t’i gëzohemi edhe dritave të pemës së Krishtlindjeve. Moderatorja e “Thumb ON” Fatma ka bërë një status në Instagram, ku ju bën thirrje të gjithëve që të celebrojnë jetën. Ishte një traumë e madhe, por ne duhet të jetojmë dhe të gëzohemi sërish.
“Nuk e kuptoj fare këtë sulm që po i bëhet atyre që në format e tyre po i rikthehen normalitetit, dikush me dritat e pemës, një tjeter me një selfie të qeshur, diku e dikush ne një video duke luajtur me fëmijet e tij. Kaluam një traumë të madhe, një tragjedi shumë të rëndë, jetë që nuk kthehen, mes tyre të rinj dhe fëmijë, familje të tjera të shuara… të tjerë që humbën gjithçka kishin në atë shtëpi që u bë gërmadhë. Dhimbje që nuk ka fjalë të përshkruhet, por nëqoftëse qajmë, ulërasim, stresohemi, sëmuremi a ku di unë, a do kthejmë gjë pas? A do zhbehet e gjitha kjo, nëqoftëse bëhemi fatalistë? JO! Dhimbja nuk eshte garë kush e shfaq më shumë, kush ulërin më fort apo kush duket më i vuajtur…Ne kemi një traditë kaq të shëmtuar në përqasje me vdekjen (kur humbasim dikë të dashur), një lloj ndëshkimi ndaj vetes dhe atyre që jetojnë, na duket e padrejtë që ne jetojmë dhe gëzojmë, ndërkohë që duhet të jetë e kunderta, duhet të reflektojmë mbi jetën e të ndihemi me fat që marrim ende frymë! Ajo që duhet tani, është ndihma për të sistemuar ata që janë pa çati në kokë dhe kjo ndihmë nuk ka munguar si nga qytetarët e thjeshtë deri te ato shtete që kanë dhuruar miliona euro. Jeta vazhdon, jeta kjo është! Le të shërbejë ky moment për të kuptuar sa të vegjël jemi, sa idiote janë meritë që mbajmë, sa të pakuptimta janë ato arsyet e vogla për të cilat stresohemi çdo ditë! Le të shërbejë ky moment për të kuptuar njerëzit e rëndesishëm për ne, pikërisht ata që shtrënguam fort këto ditë…le të shërbejë e gjitha kjo t’i gëzohemi jetës, të mos nxijmë e sterrojmë pa asnjë arsye duke shfryrë për çdo gjë, se e gjitha kjo u duk si një mësim nga ato që Universi a Zoti të dergon për të thënë; doni të shfryni e të qani ju, ja ku po jua jap unë një arsye të mirë për të ulëritur, meqenëse keni harruar të jeni mirënjohës e të thoni FALEMINDERIT për gjithçka keni, por shikoni vetëm zi. Gjithsecili zgjedh formën e vet për të kaluar këtë situate kaq të rëndë psiko-emocionale dhe sociale, ju lutem mos gjykoni. Ju lutem mos ndaloni jetën dhe kthimin e normalitetit. Ju lutem celebroni JETËN”,-shkruan Fatma në Instagram.