Monstër apo e sëmurë prej ilaçeve? Gjyqi që po trondit SHBA-në, nëna akuzohet për vrasjen e tre fëmijëve të saj

Një nga gjyqet më tronditëse që po zhvillohet në SHBA ka rikthyer në qendër të vëmendjes një tragjedi të rëndë familjare. Lindsay Clancy, 36 vjeç, akuzohet për vrasjen e tre fëmijëve të saj të vegjël, Cora 5 vjeç, Dawson 3 vjeç dhe Callan vetëm 8 muajsh, në shtëpinë e familjes në Duxbury, Massachusetts, më 24 janar 2023.

Sipas akuzës, Clancy i mbyti fëmijët ndërsa bashkëshorti i saj i atëhershëm, Patrick Clancy, ishte larguar nga shtëpia për të marrë ushqim dhe për të shkuar në farmaci. Kur u kthye, ai gjeti fëmijët në bodrum dhe telefonoi urgjencën. Në telefonatën 911, ai dëgjohet duke bërtitur se gruaja e tij “i vrau fëmijët”.

Pas ngjarjes, Lindsay Clancy tentoi të vetëvritej duke u hedhur nga një lartësi dhe pësoi dëmtime të rënda, duke mbetur e paralizuar nga mesi e poshtë. Ajo është deklaruar e pafajshme për tre akuzat e vrasjes, ndërsa gjyqi po përqendrohet te pyetja nëse ajo ishte e vetëdijshme për veprimet e saj në momentin e tragjedisë.

Prokuroria pretendon se Clancy i vrau fëmijët me vetëdije dhe se kishte krijuar një situatë që t’i jepte kohë për të vepruar. Sipas tyre, ajo e dërgoi bashkëshortin jashtë shtëpisë dhe më pas vrau fëmijët. Prokurorët kanë sjellë gjithashtu dëshmi se disa orë para vrasjeve ajo kishte bërë aktivitete të zakonshme me fëmijët, përfshirë një vizitë te mjeku dhe lojën në dëborë.

Por mbrojtja e paraqet një tjetër version. Avokati Kevin Reddington argumenton se Clancy vuante nga një formë e rëndë e psikozës pas lindjes dhe se në momentin e krimit nuk ishte në gjendje të kuptonte realitetin apo pasojat e veprimeve të saj. Sipas tij, problemet e saj mendore ishin përkeqësuar pas lindjes së fëmijës së tretë.

 

Nëna e Clancy-t, Paula Musgrove, dëshmoi se kishte parë një ndryshim të madh tek e bija gjatë muajve para tragjedisë. Ajo tregoi se Clancy vuante nga pagjumësia, ankthi dhe paranoja dhe se në dhjetor 2022 u kishte rrëfyer asaj dhe bashkëshortit se kishte mendime për t’u bërë keq fëmijëve. “Kjo nuk jam unë”, i kishte thënë ajo nënës së saj, sipas dëshmisë.

Edhe motra e saj tha se Clancy ishte bërë gjithnjë e më e shqetësuar dhe kishte shfaqur mendime vetëvrasëse. Në fillim të janarit 2023, ajo u shtrua për disa ditë në një institucion psikiatrik dhe familjarët menduan se gjendja e saj po përmirësohej. Megjithatë, sipas dëshmive, problemet me gjumin dhe gjendja e saj mendore vazhduan.

Në gjykatë është diskutuar gjerësisht edhe trajtimi mjekësor që ajo kishte marrë. Clancy kishte vizituar psikiatër dhe terapistë, kishte marrë disa medikamente dhe kishte kërkuar ndihmë për ankthin, depresionin, pagjumësinë dhe mendimet vetëvrasëse. Mbrojtja pretendon se kujdesi ishte i fragmentuar dhe se disa prej ilaçeve mund ta kishin përkeqësuar gjendjen e saj.

Një tjetër dëshmi e rëndësishme erdhi nga Patrick Clancy, i cili tha se rreth një javë pas vrasjeve, Lindsay i kishte treguar se kishte dëgjuar zërin e një burri që i thoshte se duhej ta bënte atë që bëri, përndryshe do të humbiste mundësinë. Prokuroria, megjithatë, thekson se mjekët që e kishin trajtuar para tragjedisë nuk kishin vërejtur shenja të qarta psikoze apo manie.

Në qendër të gjyqit tashmë qëndron një pyetje e vështirë: ishte Lindsay Clancy një nënë që planifikoi vrasjen e tre fëmijëve të saj, siç pretendon prokuroria, apo një grua e pushtuar nga një sëmundje e rëndë mendore, siç argumenton mbrojtja? Vendimi i jurisë do të përcaktojë jo vetëm përgjegjësinë penale të Clancy-t, por edhe fatin e saj të ardhshëm. Nëse shpallet fajtore, ajo mund të përballet me burgim të përjetshëm.