Publikimi i videos, nëna e Martin Canit: U trondita jashtë mase, nuk e pash dot!

Nëna e 14 vjeçarit të ndjerë Martin Cani, Florina, foli sonte në “Opinion” për herë të parë pas publikimit të pamjeve mjaft sensitive në disa media. Thotë se videon e sherrit pranë shkollës “Fan Noli” në kryeqytet, pas të cilit humbi jetën djali i saj, nuk ka mundur ta shohë dhe se është shumë e tronditur!

“Me thënë të drejtën, po mundohemi ta marrim pak veten dhe ta kthejmë dhimbjen në forcë. Dhimbja çdo ditë shtohet, por ne duam që Martinin mos ta humbim me kujtimet e tij. Gjithsesi u trondita jashtë mase shumë, tronditje e madhe psikologjike. Ne kemi falenderuar mediat që na kanë qëndruar pranë, por ishte tronditëse! Unë nuk e dija që videoja ishte e publikuar, nuk munda që ta shikoj!”

Thotë se autoritetet mund të kishin bërë diçka më shumë për zbardhjen e plotë të ngjarjes tragjike.

“Ne po ndjekim hap pas hapi seancat gjyqësore, unë u bë disa raste që nuk kam shkuar se nuk po e përballoj si nënë.  Policia e shteti duhet ta kishin zbuluar këtë. Autori është para gjykatës, por akoma nuk ka marrë një dënim. Unë kam thënë që do ndjek procedurat e gjykatës, por jemi në pritje. Pikëpyetjet janë të mëdha, unë vetë si nënë po. Ka manipulime në të gjitha drejtimet! Nuk ishin banda kriminelësh, ishin fëmijë. Nuk ka pasur tjetër njeri, është e qartë se kush e goditi.”

Theksoi se pavarësisht qëllimit që ka pasur personi i parë që ka publikuar ato pamje, mund të ishte shmangur, pasi ka forma të tjera për sensibilizim.

“Ne jetojmë me dhimbje dhe unë nuk dua që kjo pjesë të shfaqet herë pas here. Nëse kalon vijën e kuqe, duhet çdo njeri të marrë atë që meriton. Ka forma të ndryshme nëse do të ngresh zërin, jo duke shfaqur videon tepër të rëndë. Ka momente që qajmë të dy bashkë, ka momente që dalim. Po e kthejmë në forcë, nuk dua që plaga ime të shfaqet…”

Ky është reagimi i parë publik i Florinës, pasi ditë më parë në media qarkulluan pamjet e rënda të sherrit mes të miturve. Në video, shfaqeshin të miturit me etiketimet dhe gjeneralitetet përkatëse. Lidhur me këtë, Prokuroria Tiranë ka regjistruar procedim penal, për “zbulim të akteve ose të dhënave sekrete”.

Martin Cani u vra më 18 nëntor të 2024-ës, pak metra larg shkollës 9-vjeçare “Fan Noli” në kryeqytet, nga bashkëmoshatari i tij, Mario Përlleshaj. Ky i fundit, po gjykohet për veprën penale “vrasje në rrethana cilësuese” ndaj dy ose më shumë personave.

Aktualisht, çështja në fjalë po gjykohet në themel në Gjykatën e Shkallës së Parë të Juridiksionit të Përgjithshëm Tiranë.