Drama familjare vazhdon, por David Beckham i kujtoi të birit se është ende pjesë e tyre
Një foto vlen sa një mijë fjalë.
David Beckham e festoi Ditën e Nënës duke postuar një foto prekëse nga arkiva, ku shihet bashkëshortja e tij Victoria Beckham me të katër fëmijët — përfshirë edhe Brooklyn-in, megjithë raportimet për përçarje mes tyre.
Në foton e postuar në Instagram Story të dielën, Victoria shihet duke mbajtur në krahë Harper-in e porsalindur, ndërsa djemtë Brooklyn, Romeo dhe Cruz buzëqeshin drejt kamerës.
“Urime Ditën e Nënës për mamin më të mirë,” shkroi David, 50 vjeç, në mbishkrimin e fotos. Ai shtoi edhe një urim për ndjekësit në SHBA, pasi Dita e Nënës në Mbretërinë e Bashkuar festohet në mars. Gjithashtu, David i etiketoi të gjithë fëmijët — përfshirë Brooklyn-in.
Ky postim vjen vetëm një muaj pasi u raportua për një përçarje mes vëllezërve Brooklyn, 26 vjeç, dhe Romeo, 22 vjeç, për shkak të lidhjes së këtij të fundit me Kim Turnbull — e cila thuhet se kishte pasur më parë një lidhje të shkurtër me Brooklyn-in.
Megjithatë, burime pranë familjes pretendojnë se konflikti nuk lidhet me xhelozinë, por me qëllimet e mundshme të Kim për t’u lidhur me një tjetër Beckham.
Tensionet janë thelluar, veçanërisht pasi Brooklyn dhe bashkëshortja e tij, Nicola Peltz, nuk morën pjesë në asnjë nga festimet e 50-vjetorit të David-it. Sipas burimeve për Page Six, çifti nuk ka marrë pjesë në asnjë aktivitet familjar që nga dhjetori 2024.
“Nuk ishte surprizë, por askush nuk e besonte se do ta injoronin ditëlindjen e David-it,” tha një burim. “Ata kanë pasur plot mundësi për t’u bashkuar me familjen… sjellja e tyre ka qenë zhgënjyese.”
Sipas të njëjtit burim, David dhe Victoria janë gjithmonë të pranishëm në eventet e çiftit Brooklyn-Nicola, si në lançimin e markës së salcës pikante të Brooklyn-it apo premierat e filmave të Nicola-s. “Kjo është thjesht shumë e trishtueshme,” shtuan ata.
Një tjetër burim për TMZ tha se edhe vetë David dhe Victoria mund të kenë ndikuar në largimin e Brooklyn-it nga familja. Sipas tyre, Nicola nuk e pëlqen mënyrën se si David e “qorton” apo i “ulëret” në telefon Brooklyn-it për orë të tëra dhe gjithmonë del në mbrojtje të tij kur prindërit e tij e kritikojnë.
Marrëdhënia e Brooklyn-it me familjen ka ndryshuar ndjeshëm që nga fillimi i lidhjes me Nicola-n në vitin 2019, që kulmoi me një dasmë luksoze në 2022 — e cila u përfol për mosmarrëveshje mes saj dhe Victoria-s për detaje të dasmës.
Pavarësisht përpjekjeve të supozuara nga David dhe Victoria për të zgjidhur konfliktet, burimet pohojnë se ata nuk janë të gatshëm të përfshijnë Nicola-n në këto biseda, pasi ajo gjithmonë “kundërshton” dhe mbron Brooklyn-in.
Sidoqoftë, postimi i Davidit për Ditën e Nënës — me Brooklyn-in në plan të parë — duket si një përpjekje për të dhënë një mesazh paqeje. Të paktën virtualisht.
