Shtohen rastet e infeksioneve të sistemit tretës te fëmijët, flet mjekja pediatre: “Janë ngjitëse, këto janë shenjat që s’duhet të injoroni”

Ditët e fundit mjekët pediatër kanë vënë re shtim të rasteve me infeksione të aparatit tretës te fëmijët vegjël. Ajo që është më shqetësuese sipas tyre është se këto infeksione shkaktohen nga bakteri i salmonelës dhe shigelës, ndaj u kërkojnë prindërve që të kenëkujdes pasi janë infeksione shumë ngjitëse dhe manifestohen me temperaturë të lartë, të vjella dhe diarre.

“Infeksionet në përgjithësi dihet që në këtë kohë dominojnë infeksionet gastrointestinale, pra ato që prekin traktin tretës, ajo çka kemi vënë re kësaj radhe ndoshta e favorizuar edhe nga temperaturat ekstreme, kanë qenë infeksionet bakteriale të traktit gastrointestinal të tipit salmonelë, shigelë ose si quhet ndryshe dizenteri në gjuhën e popullit”,- është shprehur shefja e shërbimit infektiv në pediatri, Xhorxhina Kuli.

Mjekët shpjegojnë se prindërit nuk duhet të shqetësohen kur vënë re njolla gjaku në jashtëqitjen fëmijëve, por të drejtohen te mjeku.

“Po shfaqet diarreja dhe sidomos shenjë për infeksionet bakteriale është pjesa e mukusit dhe gjakut, duhet të paraqitemi tek mjeku i familjes, tek qendra shëndetësore më e afërt dhe nëse nuk funksionojnë ato, në urgjencë”, -u shpreh Kuli.

Salmonela dhe shigela janë infeksione që përhapen nga ushqimet e papërpunuara mirë apo mos larja e shpeshtë duarve.

“Duhet pasur kujdes sepse këto merren me ushqimet e papërpunuara mirë apo ushqimet e infektuara nga insektet e ndryshme. Kështu që sidomos për moshat e vogla duhet të kemi parasysh shmangien e ngrënies në lokalet jashtë ose në vende ku nuk zbatohet me rigorozitet rregullat e higjienës”, u shpreh mjekja. Ekspozimi i ushqimeve në temperatura të larat është një ndër shkaqet e kontaminimit të tyre me baktere. Ndaj prindërit duhet të bëjnë kujdes me ruajtjen ushqimeve. Nga kjo e mërkurë meteorologët parashikojnë një tjetër rritje të temperaturave në vendin tonë.

Share With:
Translate »
62 Views