Për herë të parë në Holandë: Një fëmijë nën 12 vjeç i nënshtrohet eutanazisë

Për herë të parë në Holandë, një fëmijë nën moshën 12 vjeç i është nënshtruar eutanazisë, sipas një njoftimi të bërë nga ministrja e Shëndetësisë, Sophie Hermans. Rasti shënon zbatimin e parë të ligjit që lejon eutanazinë për fëmijët e moshës nga 1 deri në 12 vjeç, i cili hyri në fuqi dy vjet më parë.

Sipas mediave holandeze, procedura është kryer në fund të vitit të kaluar. Identiteti i fëmijës nuk është bërë publik, ndërsa autoritetet kanë theksuar se bëhej fjalë për një të mitur me sëmundje terminale, i cili vuante në mënyrë të padurueshme dhe pa asnjë perspektivë shërimi.

Ligji holandez parashikon kushte shumë të rrepta për raste të tilla. Prindërit duhet të japin pëlqimin e tyre, mjekët duhet të konfirmojnë se vuajtja e pacientit është e pashërueshme dhe e padurueshme, ndërsa procedura duhet të respektojë një sërë kriteresh të përcaktuara me ligj.

Ministrja Hermans bëri të ditur se rasti është shqyrtuar nga komisioni i posaçëm i ngritur për të monitoruar zbatimin e legjislacionit të ri. Komisioni ka analizuar dokumentacionin dhe ka zhvilluar biseda me mjekun e përfshirë në procedurë, ndërsa gjetjet e tij i janë përcjellë prokurorisë, e cila do të vendosë nëse çdo veprim është kryer në përputhje me ligjin.

Kur rregullorja e re u miratua në vitin 2024, autoritetet vlerësuan se do të kishte mesatarisht pesë deri në dhjetë raste të tilla në vit. Ajo u krijua për fëmijët që pritet të humbin jetën në të ardhmen e afërt dhe për të cilët mjekësia nuk mund të ofrojë më lehtësim të mjaftueshëm të dhimbjes.

Përpara këtij ndryshimi, eutanazia ishte e lejuar vetëm për foshnjat deri në një vjeç në rrethana të caktuara dhe për të miturit mbi 12 vjeç. Fëmijët e grupmoshës 1 deri në 12 vjeç konsideroheshin ligjërisht të paaftë për të marrë vendime të tilla, duke lënë një boshllëk në legjislacion.

Holanda ishte vendi i parë në botë që legalizoi eutanazinë dhe vetëvrasjen me ndihmën e mjekut në vitin 2002. Ligji zbatohet vetëm në raste të veçanta dhe nën mbikëqyrje të rreptë mjekësore dhe ligjore. Ndërkohë, Belgjika fqinje u bë në vitin 2014 vendi i parë që lejoi eutanazinë për fëmijët pa kufizim minimal moshe, në kushte specifike.

Rasti i fundit pritet të rikthejë debatin etik dhe ligjor mbi eutanazinë e të miturve, një çështje që vazhdon të ndajë opinionin publik në shumë vende të botës.