Veç fruthit dhe gripit, një tjetër sëmundje ngjitëse po rrezikon fëmijët e kopshteve dhe çerdheve

Fëmijët e kopshteve duket se po rrezikohen nga një tjetër sëmundje ngjitëse veç fruthit që është kthyer në një epidemi, dhe virozave apo gripit. Bëhet fjalë për sëmundjen e parotitit ose siç njihen ndryshe në gjuhën popullore, shytat.

Alarmi është dhënë pikërisht në Tiranë nga prindër që kanë fëmijët në kopshte. Prindërit konfirmojnë se ata nuk janë lajmëruar nga punonjësit e kopshtit për të marrë masa, ndërsa disa fëmijë të prekur nga shytat nuk kanë shkuar prej ditësh në kopsht. Prindërit shprehen të shqetësuar për fëmijët e tjerë ndaj dhe kërkojnë marrjen e masave për sigurinë e shëndetit të fëmijëve pasi kjo sëmundje përhapet më shpejt në ambiente kolektive siç janë dhe ambientet e kopshteve apo dhe çerdheve.

Çfarë janë shytat

Zakonisht sëmundja e parotitit shfaq ethe dhe temperaturë deri në 39.4 gradë, e shoqëruar nga dhimbja e kokës dhe humbja e oreksit. Simptoma klasike e kësaj sëmundje është enjtja dhe dhimbja e gjëndrave pranë veshit, duke i bërë faqet e fëmijës të ngjajnë të fryra ( sikur e kanë mbushur gojën me ushqim ). Zakonisht gjëndrat bëhen më të fryra dhe më të dhimbshme nga dita 1-3, duke u përkeqësuar në rastet kur fëmija ha, flet, përtypet, pi lëngje ( kryesisht lëngje frutash me përmbajtje acide, si lëngu i portokallit ).

Kjo sëmundje mund të preki si gjëndrën e majtë ashtu edhe të djathtën, por rrallë ndodh që të infektohen të dyja njëkohësisht. Në disa raste të rralla kjo sëmundje do të infektoj edhe grupe të tjera të gjëndrave të pështymës (pra jo vetëm ato parotide) dhe nëse ndodh kjo, tek fëmija do të shfaqet fryrje në pjesën e poshtme të gjuhës, në pjesën e poshtme të mandibulës si edhe në pjesën e përparme të gjoksit.

Shytat mund të shkaktojnë inflamacion dhe ënjtje të trurit dhe organeve të tjera, edhe pse kjo simptomë fatmirësisht shfaqet shumë rrallë. Këto dëmtime zakonisht konsistojnë në shfaqjen e encefalitit (inflamacion i trurit) dhe meningitit (inflamacion në mukozën e trurit dhe palcës kurrizore).

Simptoma të tjera të zakonshme janë forcimi i qafës, dhimbje koke, të përziera, të vjella, gjendje gjumi, konvulsione etj.

Share With:
Translate »
1223 Views